“Гуманистик этнокультура традицияләре Һәм тәрбияви процесс” дигән темага методик семинар

16 декабрьдә татар теле һәм әдәбияты укытучылары, мәктәпкәчә белем бирү учреждение педагоглары өчен Бөтендөнья татар конгрессының Әлмәт бүлекчәсе оештырган «Гуманистик этнокультура традицияләре һәм тәрбияви процесс» дигән методик семинар Әлмәт дәүләт муниципаль хезмәт институтының актлар залында үтте. Аның төп максаты: Бөтендөнья татар конгрессы Әлмәт бүлекчәсе бюро әгъзалары, Бөтендөнья татар конгрессы Башкарма комитеты вәкилләре белән бергә үсеп килүче яшь буынга милли белем һәм тәрбия бирү мәсьәләләрен уртага салып сөйләшү, алга таба бергә эшләү юлларын һәм конкрет чараларны билгеләү.
Методик семинарда Бөтендөнья татар конгрессы Башкарма комитеты рәисенең мәгариф буенча киңәшчесе Лотфуллин Марат Вазыйх улы, Бөтендөнья татар конгрессы Башкарма комитетының Татарстан Республикасындагы татар иҗтимагый оешмалары белән эшләү бүлеге мөдире Шакиров Данис Фәнис улы, Әлмәт муниципаль районы башлыгы урынбасары, район Советы рәисе урынбасары Хәйдәрова Наҗия Мисбах кызы, мәгариф идарәсе башлыгы Ганиев Рафаэль Марат улы һәм Бөтендөнья татар конгрессы Әлмәт бүлекчәсе бюро әгъзалары катнаштылар.
Бөтендөнья татар конгрессының Әлмәт бүлекчәсе җитәкчесе, ӘДМХИ ректоры Сәлахов Ильяс Рәхимҗан улы бюро эшчәнлегенең төп юнәлешләрен билгеләп үттте һәм 2014 нче елга планнар белән таныштырды. Бөтендөнья татар конгрессы Башкарма комитеты вәкилләре милли мәгарифкә кагылышлы мәсьәләләрне яктырттылар һәм гимназиядә, татар мәктәпләрендә укыту процессы бары ана телендә генә булырга тиеш дигән фикер белдерделәр.
Семинар барышында укытучылар һәм тәрбиячеләр милли белем һәм тәрбия бирү буенча тәҗрибәләре белән уртаклаштылар.
Методик семинарда катнашучылар татар халкының мәдәниятен, телен, гореф-гадәтләрен, милли үзенчәлекләрен саклау һәм үстерү, яшь буынны милли рухта тәрбияләү буенча өзлексез эш алып барырга кирәк икәнлекне белдерделәр.
Семинар ахрында милли мәгариф мәсьәләләрен хәл итүгә юнәлтелгән резолюция кабул ителде, укытучылар һәм мәктәпкәчә белем бирү учреждение педагогларына сертификатлар тапшырылды.