Татарстан Республикасының “Мәгариф” өстенлекле милли проекты кысаларында сәләтле яшьләрне бүләкләү тантанасы

2013 елның 23 декабрендә “Ак Барс” яшьләр үзәгендә Татарстан Республикасында “Мәгариф” өстенлекле милли проектны тормышка ашыру кысаларында Татарстан Республикасының Мәгариф һәм фән министрлыгы тарафыннан сәләтле яшьләрне тәбрикләү тантанасы булып узды. Тантанада Россия һәм регион олимпиадаларында һәм бәйгеләрендә призер һәм җиңүчеләрне, аларны әзерләүче педагогларны бүләкләделәр.
Тантанада Татарстан Республикаы Дәүләт Советы рәисе урынбасары Ратникова Римма Атласовна, Татарстан Республикасының мәдәният, фән, мәгариф һәм милли мәсьәләләр буенча Дәүләт Советы Комитеты рәисе Вәлиев Разил Исмәгыйлевич, Татарстан Республикасы Министрлар Кабинеты, ВУЗлар, министрлык һәм ведомстволар, иҗтимагый оешма вәкилләре катнаштылар.
Барлыгы йөз җитмеш бер кеше бүләкләнде, аларның йөз алтмыш өчесе – Россия Федерациясе Президенты премиясе лауреаты, ә сигезе Татарстан Республикасы Президенты стипендиаты булдылар. Татарстан Республикасы Президенты стипендиатларының бишесе бер үк вакытта Россия Федерациясе Президенты премиясе белән дә бүләкләнде:
- Шәйхетдинов Нурислам Марат улы - К(П)ФУ ның биология факультеты бакалавры;
- Зималиев Андрей Валерий улы - К(П)ФУның экология һәм табигатьне куллану факультеты бакалавры;
- Силкина Диана Рәшит кызы - К(П)ФУның көнчыгышны өйрәнү факультеты студенты;
- Минубаев Зөфәр Фәрит улы – К(П)ФУның фундаменталь һәм гамәли химия факультеты студенты;
- Мортазин Азат Инзир улы – КДМУның дәвалау факультеты студенты.
Премияләр биш номинация буенча түбәндәгечә билгеләнде:
• Социаль әһәмияткә ия булган һәм иҗтимагый эшчәнлек – 22 кеше.
• Фәнни-техник иҗат, уку-тикшеренү эшчәнлеге – 110 кеше.
• Һөнәри осталык – 13 кеше
• Сәнгати иҗат – 7 кеше.
• Һәвәскәр спорт – 11 кеше.
Россия күләмендә үткәрелгән олимпиада һәм бәйгеләрнең җиңүчеләре 60 мең сум күләмендә (барлыгы 2040,0 мең сум, 34 кеше), Россия олимпиадаларының призерлары һәм регион олимпиадаларының җиңүчеләре 30 мең сум күләмендә (барлыгы 3600,0 мең сум, 120 кеше) акчалата бүләкләнде. Бүләкләү суммасы федераль бюджеттан бүлеп бирелде.
Тантанада премия лауреатларына Россия Федерациясе Мәгариф һәм фән министрлыгы дипломнары һәм истәлекле бүләкләр, ә педагогларга Татарстан Республикасы Мәгариф һәм фән министрлыгының рәхмәт хаты, истәлекле бүләкләр тапшырылды һәм чәчәкләр бүләк ителде.