Яңа ел бәйрәмнәре алдыннан “Костер” республика балаларны сәламәтләндерү-белем бирү үзәге информатика һәм хокук фәннәренә интенсив өйрәтү буенча республика сменасында катнашучыларны каршылады

Яңа ел бәйрәмнәре алдыннан “Костер” республика балаларны сәламәтләндерү-белем бирү үзәге информатика (18.12.13 – 26.12.13) һәм хокук (21.12.13 – 26.12.13) фәннәренә интенсив өйрәтү буенча республика сменасында катнашучыларны каршылады.
Информатика һәм хокук буенча республика олимпиадаларының призерлары һәм резервтагы катнашучылары төрле дәрәҗәдәге олимпиадаларга бик җитди әзерләнәләр. Н.Г. Нигъмәтуллина (Санкт-Петербург) һәм И.Р. Җиһаншина (Мәскәү) үткәргән дәресләрдә укучылар төрле катлаулы мәсьәләләр чиштеләр.
Смена барышында Татарстан Республикасы Конституция суды судьялары А.Р.Шакараев һәм А.А.Хаммматова белән очрашу булды. Судьялар Россия Федерациясе һәм Татарстан Республикасы Конституция судларының эшчәнлеге турында сөйләделәр; Татарстан Республикасы Конституция судына мөрәҗәгать итү тәртибе, конституцион хокук өлкәсендәге кайбер мәсьәләләр буенча үзләренең фикерләре һәм эш тәҗрибәләре белән уртаклаштылар.
Кичен укучылар шахмат, шашка уйнадылар; кинофильмнар карап, фикер алыштылар. Бәйрәмчә бизәлгән яшел чыршы, саф һавада йөрүләр укучыларның кәефен аеруча күтәрде.
Олимпиадаларда булган дулкынлану һәм борчылулар белән тагын бер ел артта кала. Яңа 2014нче елда укучыларыбызга зурдан-зур уңышлар телибез!