2014 нче ел Костер” республика балаларны сәламәтләндерү - белем бирү үзәге хезмәткәрләре өчен кызыклы һәм уңышлы эшләр белән башланып китте

2014 нче ел Костер” республика балаларны сәламәтләндерү - белем бирү үзәге хезмәткәрләре өчен кызыклы һәм уңышлы эшләр белән башланып китте. 3нче гыйнвардан 9 нчы гыйнварга кадәр үзәккә Татарстан варислары союзының “Галстуклы ил” / “Галстучная страна” республикакүләм профильле сменасында катнашучылар җыелды.
Сменаны Татарстан Республикасы Мәгариф һәм фән министрлыгының тәрбия һәм өстәмә белем бирү бүлеге мөдире Э.Р.Сафинаның җылы сүзләре ачып җибәрде.
Сменада катнашучылар “Йолдыз яшүсмер” /“Звездный подросток”/, “Зур биюләр” /“Большие танцы»/, “Көйне тап” / “Угадай мелодию”/ кебек кызыклы чараларда актив катнаштылар. Укучылар үзләренең белем һәм шөгыльләрен иҗади остаханәләрдә дә күрсәттеләр. Татарстан Республика Милли музеенда тарихи күргәзмәләр карап, файдалы мәгълүматлар тупладылар. Габдулла Кариев исемендәге Казан татар дәүләт яшь тамашачы театры куйган “Яңа ел әкияте” аларны балачак һәм тылсым дөньясына алып китте.
Америка кунакларын дулкынланып көтү һәм каршылау хәтерләрдә озак сакланыр әле. Безнең малайлар һәм кызлар Америка студентларына бик рәхәтләнеп татар һәм рус халыкларының гореф-гадәтләре турында сөйләделәр. Америкадан килгән кунакларга чаңгыда шуу да бик ошады.
Смена кысаларында республикакүләм әйдаманлык осталыгы (вожатское мастерство) бәйгесенең финалы үткәрелде. Республикабызның төрле почмакларыннан килгән финалистлар үзләренең педагогик осталыкларын күрсәттеләр.
Сменаның ябылу тантанасында республикакүләм әйдаманлык осталыгы (вожатское мастерство) бәйгесенә нәтиҗә ясалды, сменаның иң актив катнашучылары да дипломнар белән бүләкләнде. Смена “Галстуклы ил” йолдызлы фестивале белән бик күңелле тәмамланды. Яңа ел башланды, димәк, “Костер” үзәген яңа казанышлар һәм зур уңышлар көтә.