Омск өлкәсенең Үләнкүл мәктәбе укучысы татар теле буенча Бөтенроссия олимпиадасында җиңде

Олимпиадада Россия Федерациясенең 17 төбәгеннән мәктәп укучылары катнашты. Омск өлкәсенең Большеречье районы Үләнкүл урта гомумбелем бирү мәктәбенең 11 сыйныф укучысы Рита Потапова «Нәфис сүз» номинациясендә җиңү яулады. Ул татар телен, татар шигъриятен искиткеч яхшы белүе белән бергә, артистлык осталыгын да күрсәтте. Рита Потаповага Татарстан Мәгариф һәм фән министрлыгының беренче дәрәҗә дипломы тапшырылды.
- Омск өлкәсе вәкилләре ел саен төбәкара олимпиададан төрле номинацияләрдә җиңүче дипломнары белән кайта. Алар арасында һәрвакыт Үләнкүл мәктәбе укучылары да була. Жюри әгъзалары аларның татар телен бик яхшы белүен билгеләп үтә, - ди Омск өлкәсе Мәгариф министрлыгының баш белгече Ирина Агафонова.
Үләнкүл урта гомумбелем бирү мәктәбе – Большеречье районында татар теле факультатив рәвештә түгел, ә аерым фән буларак укытыла торган бердәнбер мәктәп. Үләнкүл авылында татар мәдәнияте үзәге эшләп килә. Омск өлкәсендә мәктәп укучылары арасында немец, татар, казах телләре буенча олимпиадалар даими рәвештә үткәрелеп килә. Оештыручылар фикеренчә, мондый иҗади бәйгеләр, беренче чиратта, Иртыш буенда яшәүче халыкларның милли мәдәниятен саклауга юнәлдерелгән.