Энгель Фәттахов: Безгә сәләтле балалар белән эшләү системасын камилләштереп бетерергә кирәк

Бүген Татарстан Республикасы Премьер-министры урынбасары – Татарстан Республикасының мәгариф һәм фән министры Энгель Фәттахов “Сәләтле балаларны барлау, аларга ярдәм итү һәм үстерү” юнәлешендә эшләүче мәгариф оешмалары җитәкчеләре белән очрашты. Казан, Яр Чаллы, Түбән Кама, Бөгелмә, Буа, Арча, Актанышның иң яхшы лицей-интернатлары һәм югары дәрәҗәдәге мәктәпләре директорлары сәләтле балалар белән эшләүне һәм аларны кечкенәдән барлауны оештыру буенча үз тәкъдимнәрен министрга җиткерде.
“Әлеге мәгариф оешмаларында белем дәрәҗәсен булдыру өчен система булырга тиеш. Күп нәрсә сездән – директорлардан һәм сезнең нинди укытучылар командасы булдыруыгыздан тора”, - дип ассызыклады Энгель Фәттахов.
Министерствоның гомуми белем бирү идарәсе җитәкчесе Тамара Федорова очрашуда катнашучыларны мәгариф оешмаларында укучыларның сәләтле балалар өчен үткәрелгән олимпиадаларда катнашу нәтиҗәләре белән таныштырды. Кыска анализ сәләтле балалар белән эшләүне тагын да арттырырга кирәклеген күрсәтә.
Мәгариф һәм фән министрлыгы башлыгы Энгель Фәттахов үзенең чыгышында биредә җыелганнарның күбесенең инде Финляндиягә һәм Англиягә барып кайтканын, әлеге илләрдәге мәгариф системасының ничек оештырылуы белән танышканлыгын ассызыклап үтте. “Мин әлеге сәяхәтләрнең Татарстан Республикасының мәгариф оешмаларында укыту практикасында иң алдынгы инновацион технологияләрне куллануны кертергә мөмкинлек тудыруын һәм бик зур стимул булып торуын беләм”, - дип искәртте Энгель Фәттахов.
Үз чиратында мәгариф оешмалары җитәкчеләре сәләтле балалар мәктәпләрендә җан исәбенә финанслау нормативларын яңадан карау, республика һәм Бөтенроссия олимпиадаларында җиңүчеләрне әзерләгән укытучыларга грантлар билгеләү, җитәкчеләр һәм укытучылар өчен Мәскәү физико-технологик институтында, Россиянең һәм чит илләрнең әйдәп баручы башка югары уку йортларында квалификацияләрен күтәрү мөмкинлеге тудыру турындагы тәкъдимнәре белән чыгыш ясады.
“Миңа сезнең белән очрашып, сездә әлеге эшләрнең ничек оештырылуы һәм безнең тарафтан нинди методик һәм башка төрле ярдәм кирәклеге хакындагы фикерләр белән уртаклашу ошый. Сезнең нәтиҗәләр бик яхшы, сезнең ярдәм белән башка югары дәрәҗәдәге мәктәпләрдә дә югары нәтиҗәләргә ирешә алырбыз дип уйлыйм. Без сәләтле балалар өчен мәктәп-интернатлар челтәрен үстерү концепциясен әзерлибез һәм анда сезнең тәкъдимнәрегез дә исәпкә алыначак”, - дип йомгаклады министр.