Татарстан Кырым татарларына милли мәгариф системасын җайга салырга ярдәм итәчәк

8 апрельдә Кырым Республикасы белән хезмәттәшлек мәсьәләләре буенча уздырылган киңәшмәдә Татарстанның Кырым белән, аерым алганда, ярымутрауның Бакчасарай районы белән, хезмәттәшлекнең өстенлекле юнәлешләре турында фикер алыштылар.
Киңәшмә Бакчасарайда узды, анда Татарстан Премьер-министры Илдар Халиков катнашты. Татарстан делегациясе составында шулай ук ТР вице-премьеры – фән һәм мәгариф министры Энгель Фәттахов, Татарстан Президенты Аппараты җитәкчесе Әсгать Сәфәров, ТР вице-премьеры – Министрлар Кабинеты Аппараты җитәкчесе Шамил Гафаров та бар.
Беренче чиратта, Илдар Халиков Кырымлыларга кунакчыл каршы алулары өчен рәхмәт белдерде, республиканың Кырымның Бакчасарай районына шеф сыйфатында беркетелүен искәртте. Аның сүзләренчә, Татарстан белән Кырым үзара тарихи һәм мәдәни бәйләнештә. “Әмма, кызганычка каршы, соңгы елларда безнең арадагы хезмәттәшлек шактый кимеде, бүген хезмәттәшлегебезне яңарту мөмкинлегебез бар”, - дип белдерде ул.
Илдар Халиков республиканың социаль-икътисади үсеше һәм Татарстан Кырым белән нинди тәҗрибәсе белән уртаклаша алачагы турында кыскача сөйләде. Аның фикеренчә, ике төбәкнең медицина өлкәсендәге хезмәттәшлеге яхшы нәтиҗә бирергә мөмкин.
“Безнең мәгариф өлкәсендә дә уңышларыбыз бар”, - дип ассызыклады Илдар Халиков. Бакчасарай районы өчен Татарстанда җитди игътибар бирелә торган милли белем бирү системасы аеруча кызыклы булырга мөмкин. “Безнең бер үк вакытта милли белем бирүне актив үстереп, Россия белем бирү стандартларын саклап калу буенча тәҗрибәбез бар”, - дип хәбәр итте ул.
Мәдәният өлкәсендәге үзара багланышлар турында сөйләгәндә, Илдар Халиков Кырым балалар иҗат коллективларын “Йолдызлык - Созвездие” фестиваленың гала-концертына чакырды.
ТР Премьер-министры Шамил Гафаровка Бакчасарай районы белән үзара электрон багланышлар, Кырым белән Татарстан арасында видеоконференцияләр оештыру мөмкинлекләрен карауны йөкләде.
ТР Премьер-министры И.Халиков бүген шулай ук Кырым Республикасы муниципаль берәмлекләренә матди һәм методик ярдәм күрсәтү мәсьәләләре буенча Симферопольда Россия Хөкүмәте вице-премьеры Дмитрий Козак рәислегендә узачак киңәшмәдә катнашачак.
Фото: prav.tatarstan.ru сайтыннан