Алабугада “Яшел ут” республика бәйгесе старт алды

8-9 апрельдә Алабуга шәһәрендә Татарстан Республикасының мәктәпкәчә тәрбия бирү учреждениеләрендә үткән балаларның юл-транспорт вакыйгаларында имгәнүен профилактикалауга багышланган “Яшел ут” дип аталган бәйгегә нәтиҗәләр ясау чаралары узды.
8-9 апрельдә Алабуга шәһәрендә балалар юл-транспорт һәлакатьләре профилактикасы буенча тәрбиячеләр һәм мәктәпкәчә тәрбия бирү учреңденияләре арасында “Яшел ут-2014” дип исемләнгән республикакүләм бәйгесенең финал ярышлары үтте.
Бу конкурсның төп максаты мәктәпкәчә тәрбия бирү учреждениеләрендә тәрбияләнүчеләргә юл йөрү кагыйдәләрен өйрәтүне активлаштыру иде. Юл йөрү кагыйдәләрен өйрәтүдә алдынгы педагогик тәҗрибәләр белән уртаклашу, аларны тарату, яңа алым һәм формаларны кертү, уку-методик кулланмаларны яхшырту бәйге барышында төп бурычлар булып торды.
Бәйге ике этапта узган. Нәтиҗәдә иң яхшылар дип 10 мәктәпкәчә тәрбия бирү учреждениесе һәм 10 иң яхшы тәрбияче (5 шәһәр һәм 5 авыл) билгеләнгән. Тагын бер турда “Балаларга юл йөрү кагыйдәләрен өйрәтүдә мәктәпкәчә тәрбия бирү учреждениесенең иң яхшы тәрбиячесе һәм әти-әниләр арасында юл йөрү иминлеген пропагандалау” номинациясендә җиңүче билгеләнде. Алар Алабуганың 28 балалар бакчасында юл йөрү кагыйдәләреннән имтихан тапшырдылар һәм инновацион технологияләр кулланып юл кагыйдәләре буенча эшчәнлекнең бер өлешен күрсәттеләр.
Конкурс финалы кысаларында балаларның юл-транспорт вакыйгаларында имгәнүен профилактикалау буенча белгечләр катнашында семинар-киңәшмәләр үтте. Шулай ук бу көнне инспекторлар, ТР Юл хәрәкәте иминлеге фонды дирекциясе филиаллары җитәкчеләре, мәктәпкәчә тәрбия бирү белгечләре, тәҗрибә уртаклашу, балаларга юл йөрү иминлеге күнекмәләрен өйрәтү максатыннан, Алабуга шәһәренең балалар бакчаларында булдылар.
9 апрель көнне Алабуга шәһәре Мәдәният йортында бәйгенең йомгаклау өлеше үтте. Семинар-киңәшмәдә ТР вице-премьеры – Министрлар Кабинеты Аппараты җитәкчесе Шамил Гафаров, ТР мәгариф һәм фән министры урынбасары Светлана Гиниятуллина, Алабуга муниципаль районы башлыгы, Алабуга шәһәре Мэры Емельянов Геннадий Егорович катнашты. Чыгыш ясаучылар барысы бердәм булып, өлкәннәрнең балалар алдындагы җаваплылыгын тагын бер кат исләренә төшерделәр. Бу максаттан ЮХИДИ һәм мәгариф идарәсе хезмәткәрләренең, әти-әниләрнең, әби-бабайларның, гомумән, җәмгыятьтәге һәркемнең бурычлары күрсәтелде һәм бары тик шулай бердәм эшләгәндә генә юлларда балаларның имгәнү, һәлак булу очракларын киметергә мөмкин икәнлеге ассызыкланды.
Шунысы куанычлы, шәһәр балалар бакчалары җиңүчеләре арасында Алабуганың 20 нче “Әкият” балалар бакчасы III урынга лаек булды.