БДИны вакытыннан алдан тапшыру этабы башланды

20нче апрельдән Россия Федерациясендә дәүләт имтиханын алдан бирү хокукына ия булган агымдагы ел чыгарылыш сыйныф укучылары өчен БДИны вакытыннан алдан бирү этабы башланды. Татарстанда әлеге укучылар 14әү. 21нче апрельдә Казан шәһәренең татар телендә белем бирүче 3нче гимназиясендә алар рус теленнән имтихан тапшырачак. Имтихан 10 сәгатьтә башлана.
БДИны вакытыннан алда тапшыруга кертелгән укучылар:
-Испаниягә халыкара турнирга китүче “Рубин” спорт мәктәбенең 7 спортчысы;
- халыкара ярышларга җыенучы 4 кеше (су тубы буенча 2 спортчы (Венгрия) һәм теннис буенча 2 спортчы (Италия);
- даими яшәү урыны буларак, Сирия Гарәп Республикасына китүче кыз;
- медицина күрсәткечләре буенча БДИ тапшыруга күрсәтмә алган бер кыз.
Имтиханны алу пунктларында ТР Дәүләт имтихан комиссиясе вәкилләре, күзәтчелек һәм контроль департаменты хезмәткәрләре, җәмәгатьчелек күзәтүчеләре була.
Гомумән алганда, Россиядә 65 төбәктән якынча 1,5 мең укучы БДИны вакытыннан алда тапшыра.
БДИ үткәрү вакыты турында исегезгә төшерәбез:
БДИны вакытыннан алда тапшыру чоры – 21 нче апрельдән алып 8 нче майга кадәр:
21нче апрель –рус теле, 24 нче апрель - чит телләрдән һәм химиядән, 28 нче апрельдә - математика, 5 нче майда – биология, җәмгыять белеме һәм информатика, 8 нче майда – барлык фәннәр буенча резерв көн.
Агымдагы елда мәктәпне тәмамлаучылар һәм барлык теләк белдерүчеләр өчен төп вакыт – 26 нчы майдан алып 19 нчы июньгә кадәр. Мәҗбүри имтиханнар 29 нчы майда (рус теле) һәм 5 нче июньдә (математика) була.
Өстәмә вакыт (үткән елларда мәктәпне тәмамлаучылар һәм һөнәри белем бирү оешмалары өчен) – 7-16 нчы июльдә.