Казанда укытучыларның фәнни-методик конференциясе узды

2014нче елның 18 нче апрелендә, республиканың “Киләчәк” мәгарифне үстертү Стратегиясе кысаларында, Казан шәһәренең 90нчы гимназиясендә укытучыларның фәнни-методик конференциясе уздырылды. Чарада Казан шәһәреннән һәм республиканың Әлмәт, Яр Чаллы, Менделеевск, Лениногорск, Яшел Үзән, Мөслим, Апас, Норлат, Спас, Кукмара һ.б. районнарыннан укытучылар, Казан (Идел буе) федераль университеты аспирантлары, галимнәре – барлыгы 195 кеше катнашты. Конференция кысаларында мастер-класслар уздырылды, фән секцияләре эшләде.
Конференция укытучыларның һөнәри осталыкларын үстерү, гомуми белем бирү учрежденияләрендә фәнни-теоретик һәм укыту-методик материалларны барлау, гамәлгә кертү максатыннан уздырылды.
Конференциянең оештыручылары - Татарстан Республикасы Фән һәм Мәгариф министрлыгы, Санкт-Петербург шәһәренең “Белем бирү сыйфаты белән идарә итү: нәтиҗәле җитәкчелек итүнең теориясе һәм эш тәҗрибәсе” журналы, Казан (Идел буе) федераль университеты, Казан шәһәренең Мәгариф идарәсе.