Чаллыда яңа 5 балалар бакчасы ачылды

Бүген Яр Чаллыда бер үк вакытта яңа 5 балалар мәктәпкәчә белем бирү учреждениесе үз эшен башлады. Тантаналы ачылышта ТР Президенты Рөстәм Миңнеханов катнашты.
ТР Президенты Автошәһәргә эш сәфәре барышында “Яшьлек” микрорайонында яңа 108 нче балалар бакчасында булды. Бүген ачылган калган 4 балалар бакчасы кебек, бу бакча да федераль бюджеттан финанслау белән балалар бакчалары төзү буенча республика программасы нигезендә сафка бастырылган. 260 урынлы балалар бакчасын төзү 138,4 млн.сумга төшкән, шул исәптән 105 млн. сум – республика бюджетыннан һәм 33,4 млн.сум – РФ бюджетыннан.
Рөстәм Миңнеханов балалар бакчасын карады, балалар белән аралашты, соңыннан актлар залына үтте, анда бүген ачыла торган тагын 4 балалар бакчасы белән туры элемтә оештырылды. 107 нче балалар бакчасыннан ТР төзелеш, архитектура һәм ТКХ министры Ирек Фәйзуллин объектның сафка бастырылуын хәбәр итте. 41 нче балалар бакчасыннан туры элемтәгә ТР вице-премьеры – сәнәгать һәм сәүдә министры Равил Зарипов чыкты. Ул хәбәр иткәнчә, балалар бакчасын 71 миллион сумга капиталь ремонтлау эше югары сыйфатта башкарылган.
110 нчы балалар бакчасында видеоэлемтә буенча ТР вице-премьеры – ТР мәгариф һәм фән министры Энгель Фәттахов чыгыш ясады, ул хәбәр иткәнчә, балалар бакчасы тулысынча персонал белән тәэмин ителгән һәм эксплуатацияләүгә әзер. 109 нчы балалар бакчасыннан ТР ДСның Социаль сәясәт комитеты рәисе Светлана Захарова туры элемтәгә чыкты.
108 нче балалар бакчасында Яр Чаллы мэры Васил Шәйхразиев чыгыш ясады. Ул искәртеп үткәнчә, элегрәк шәһәрдә 5 балалар бакчасы бер үк вакытта 35 ел элек кенә, 1979 нчы елда ачылган. Шәһәр башлыгы ТР төзелеш, архитектура һәм ТКХ министрына, төзүчеләргә сыйфатлы һәм тиз арада башкарылган эш өчен, яңа балалар бакчасын төзү процессын күзәткән әти-әниләргә рәхмәт белдерде. Васил Шәйхразиев Чаллы халкы исеменнән ТР Президенты Рөстәм Миңнехановка рәхмәт әйтте.
Р.Миңнеханов үз чыгышында хәбәр иткәнчә, быел Яр Чаллыда 8 балалар бакчасы ачылачак. “Безнең балаларны лаеклы мәктәпкәчә белем белән тәэмин итү – ул безнең бурыч, - дип ассызыклады ТР Президенты. – Безнең киләчәк балаларыбызда”.
Ул 108 нче балалар бакчасына интерактив укыту комплексына сертификат тапшырды һәм мондый сертификатларның бүген ачылган калган балалар бакчаларында да тапшырылачагын хәбәр итте. Бу хакта ТР Президенты матбугат хезмәте хәбәр итә.