Беренче күчмә җәйге смена "Бәхетнең җиде төсе"

20-22 август көннәрендә Татарстан Республикасы Мәгариф һәм фән министрлыгы һәм Казан шәһәренең Киров районында урнашкан балалар йорты Татарстан Республикасының Питрәч районы муниципаль башкарма комитеты катнашында ятим яки ата-ана карамагыннан мәхрүм калган балаларны тәрбиягә алучы гаиләләр өчен “Бәхетнең җиде төсе” дип аталган беренче күчмә җәйге сменаны уздырдылар. Чара Питрәч районының “Чайка” балалар савыктыру лагерендә узды.   
Сменада Казан шәһәрендә, Питрәч, Лаеш, Яшел үзән, Балык бистәсе районнарында яшәүче ятим яки ата-ана карамагыннан мәхрүм калган балалар тәрбияләүче 18 гаилә, “Свет-Нур” дип аталган ятим һәм инвалид балалар тәрбияләүче гаиләләрнең региональ иҗтимагый оешмасы, “Без бергә” иҗтимагый оешмасы, “Ата йорты” региональ иҗтимагый оешмасы, “Татарстан скаутлары” республика скаутлар үзәге, “Родники мира” хәйрия фонды катнашты.
Әти-әниләр һәм балалар команда уеннарында, иҗади конкурсларда һәм мастер-классларда  катнаштылар. Ата-аналар өчен тренинглар оештырылды.
Ата-аналарга һәм балаларга үзләренә читтән карау, үзләрен бердәм команда итеп хис итү, яхшы тәэсирләр генә түгел, үз куллары белән ясалган сувенирлар алып кайту мөмкинлеге бирелде. Һәр катнашучы грамота белән бүләкләнде.
Бу чара җәмгыятьтә гаилә абруен күтәрүгә, ятим яки ата-ана карамагыннан мәхрүм калган балаларны тәрбияләүче гаиләләрнең уңай тәҗрибәләрен таратуга, балалар һәм ата-аналарны берләштерүгә, гаилә тәрбиясе тәҗрибәсен таратуга, гаиләләрне ял иттерүгә, олылар һәм балаларның үзара мөнәсәбәтләрен камилләштерүгә юнәтелгән иде.