Чүпрәле районында яңа балалар бакчасы ачылды

Бүген Татарстанның Чүпрәле районы Иске Чүпрәле авылында ТР Премьер-министры Илдар Халиков һәм аның урынбасары – ТР фән һәм мәгариф министры Энгель Фәттахов катнашында яңа балалар бакчасы ачылды.
Иске Чүпрәле 2 нче балалар бакчасы 80 балага исәпләнгән. Барлык урыннарның да нәни хуҗалары бар инде. Ике катлы бинаның мәйданы 1,8 мең кв метр тәшкил итә. Балалар бакчасы территориясендә уен мәйданчыклары да бар.
Якын киләчәктә балалар бакчасында өстәмә белем бирү хезмәте күрсәтеләчәк, чит телләр укытылачак, интеллектуаль һәм музыкаль мөмкинлекләр үстереләчәк, сәламәтләндерү гимнастикасы тәкъдим ителәчәк, кыска вакытлы адаптация һәм шимбә төркемнәре дә ачылачак.
Балалар бакчасы төзелеше 47 млн сум тәшкил иткән, аның 27 млн сумы республика бюджетыннан.
Мәртәбәле кунаклар Иске Чүпрәледә яңа бинаны һәм аның җиһазлау дәрәҗәсен карадылар. Аларны биредә яшәүчеләр, шул исәптә район башлыгы Александр Шадриков һәм балалар каршы алды. Балалар музыка-спорт залында бәйрәм концерты күрсәттеләр, кунакларга яңа балалар бакчасы өчен рәхмәт белдерделәр.
“Бу араларда һәр көн диярлек 2-3 объект ачабыз, алар барысы да президент программасы буенча файдалануга тапшырыла”, - диде Илдар Халиков.
Ул төзүчеләргә үз эшләрен сыйфатлы башкарулары һәм балалар бакчасы мөдире Зөлфия Миңнебаевага ачылыш программасын әзерләгән өчен рәхмәт белдерде, ата-аналарга һәм балаларга уңышлар теләде.