Нурлаттан Алла Головенькина “Россиянең ел укытучысы-2014” исеменә дәгъва кылучы 15 кеше арасына керде

Мәскәү өлкәсенең Мытищи шәһәрендә “Россиянең ел укытучысы-2014” Бөтенроссия бәйгесенең I турына нәтиҗәләр ясалды.
Анда Бөтенроссия ярышы финалына үткән лауреатларның исемнәре билгеле булды. 15 финалист арасына Татарстан вәкиле – Нурлат шәһәренең 1нче урта мәктәбе биология укытучысы Алла Головенькина да керде.
Читтән торып үткәрелгән өч сынауда (“Интернет-ресурс”, “Методик семинар”, “Мин – укытучы” дип аталган эссе) һәм 1 тур биремендә (дәрес) барлыгы 81 кеше катнашты.
Иртәгә узачак традицион мастер-класслардан тыш, икенче тур кысаларында 15 мөгаллим “Педагогик совет” һәм “Белем бирү проекты” биремнәрендә үзләренең нәрсәгә сәләтле икәнлеген күрсәтәчәк. 4 октябрьдә Бөтенроссия финалының биш җиңүчесе Федерация Советында үтәчәк “Белем бирүче сәясәтчеләр “Түгәрәк өстәле”ндә катнаша. 5 октябрьдә исә абсолют җиңүченең исеме билгеле булачак.