Балтач районы Чепья урта мәктәбендә III төбәкара методик семинар узды

21 нче октябрьдә Балтач районының Чепья урта мәктәбендә «Федераль дәүләт белем стандартларына күчеш шартларында төрле мәдәни яссылыкта телләр укыту методикасы» дигән темага III төбәкара методик семинар үткәрелде. Әлеге чарада Татарстан Республикасы мәгариф һәм фән министрлыгының милли мәгариф идарәсе башлыгы, Татарстан Республикасы Мәгарифне үстерү институты галимнәре, «Мари мәгариф институты»ның мари филологиясе кафедрасы мөдире, Удмурт Республикасыннан вәкилләр катнашты.
Семинарга Татарстаннан, Мари Эл, Удмурт Республикаларыннан татар, рус, удмурт, мари милләтеннән булган укучыларга телләрне төрле мәдәни яссылыкта өйрәтүче укытучылар чакырылган иде. Эш барышында мастер-класслар күрсәтелде, ачык дәресләр үткәрелде, мөгаллимнәр эш тәҗрибәсе белән уртаклаштылар.Түгәрәк өстәл артында укыту барышында килеп чыккан җитди мәсьәләләр күтәрелде, семинарда катнашучылар аларны уңай якка хәл итү хакында фикер алыштылар.