Татарстан Мәгариф һәм фән министрлыгы делегациясе Самара һәм Сарытау өлкәләренә сәфәр кылды

Татарстан Премьер-министры урынбасары — мәгариф һәм фән министры Энгель Фәттахов җитәкчелегендәге Татарстан Республикасы Мәгариф һәм фән министрлыгы делегациясе Самара һәм Сарытау өлкәләренә сәфәр кылды, биредәге милли мәктәпләр белән танышты һәм төбәк белем бирү системасы үсешендәге инновацион тәҗрибәне өйрәнде.

Аерым алганда, делегация әгъзалары Сарытау шәһәрендәге татар гимназиясендә, Сарытау өлкәсесенең Яңа Әләзән авылындагы татар этномәдәни компонентлы мәктәптә, Самара каласындагы “Яктылык” мәктәбендә һәм башка белем бирү учреждениеләрендә булды.

Шулай ук өлкәләрдәге татар милли-мәдәни мохтарияте, татар иҗтимагый оешмалары вәкилләре, шулай ук татар этномәдәни компонентлы мәктәпләрнең мөгаллимнәре һәм укучылары белән очрашып, милли мәгарифне үстерү мәсьәләләре хакында фикер алышты.

Моннан тыш, Сарытау өлкәсендә Татарстан Мәгариф һәм фән министрлыгы, Сарытау өлкәсе Мәгариф минситрлыгы һәм Татарстанның Сарытау өлкәсендәге Сәүдә-икътисади вәкиллеге тарафыннан оештырылган “Татар мәгарифе көннәре” узды. Сәфәр нәтиҗәсе буларак, ике министрлык арасында Мәгариф өлкәсендә хезмәттәшлек итү турында килешү имзаланды.