Сәламәтлек буенча мөмкинлекләре чикле балалар өчен имтихан материаллары әзерләнгән

Мәгариф һәм фән өлкәсендә күзәтчелек буенча федераль хезмәт сәламәтлек буенча мөмкинлекләре чикле һәм дәвамлы дәваланудагы балалар өчен 2015 елда бердәм дәүләт имтиханнарын тапшыру өчен кирәк булган уңайлы шартлар тудыра.
Узган елдагыча, ведомство БДИ тапшыручы күрү сәләте тайпылышлары булган укучыларга контроль-үлчәү материалларын Брайль шрифтына күчергән, җаваплар өчен махсус дәфтәрләр әзерләнгән. Бирелгән гаризалар нигезендә, барлыгы 500ләп комплект эшләнгән. Хастахәнәдә дәвамлы дәвалау курсы узучыларга Россиянең төрле төбәгенең дәвалау оешмаларында барлыгыимтихан тапшыру буенча 80 пункт эшләячәк. Элек мондый укучылар сынауны үзе яшәгән җирдә генә тапшыра ала иде. Россиянең башка төбәгендә дәваланучы балаларга бу авырлык тудырды.
Сәламәтлек буенча мөмкинлекләре чикле мәктәпне тәмамлаучылар дәүләт йомгаклау аттестациясен дәүләт чыгарылыш имтиханы яки бердәм дәүләт имтиханы рәвешендә яисә әлеге ике төрне бергә дә бирә ала.
БДИ тапшыру шартлары укучыларның психофизик үсеш үзенчәлекләре, шәхси мөмкинлекләре, сәламәтлеге торышын исәпкә алып оештырыла. Мәгариф һәм фән өлкәсендә күзәтчелек буенча федераль хезмәт дәүләт имтиханын тапшыру буенча методик тәкъдимнәр эшләп чыгарган. Алар балаларның сәламәтлеге торышын һәм психофизик үсеше үзенчәлекләрен исәпкә алып эшләнгән.