Татарстанда “Россия Ел укытучысы-2016” Бөтенроссия конкурсының төбәк этабы зона турлары җиңүчеләре билгеле

Татарстанда “Россия Ел укытучысы-2016” Бөтенроссия конкурсының төбәк этабы зона турлары җиңүчеләре билгеләнде. Жюри “Ел укытучысы” номинациясендә иң югары балл җыйган 41 укытучыны сайлап алды, “Педагогик дебют” номинациясендә – 20 укытучыны, дип хәбәр итә ТР Мәгариф һәм фән министрлыгы матбугат хезмәте.

Быел конкурста муниципаль дәрәҗәдә 1,2 меңләп укытучы катнашкан, шулардан 150се сынауны бәйгенең зона этабында дәвам иттергән.

Искәртеп үтик: Татарстанда “Россия Ел укытучысы-2016” Бөтенроссия конкурсының төбәк этабы зона турлары 8-29 февраль көннәрендә үткәрелде. Хәзер бу турларда җиңүгә ирешүчеләр алдында Казанда 14-18 март көннәрендә булачак финалда тагын да җитди сынау тора. Абсолют җиңүчегә 400 мең сум күләмендә, “Педагогик дебют” номинациясендә җиңүчегә 200 мең сумлык акчалата бүләк каралган. Конкурс призерларына – II урын алучыларга 100әр мең сум, III урын ияләренә 70әр мең сум күләмендә, лауреатларга һәм номинацияләрдә җиңүче дип табылганнарга 50шәр мең сум күләмендә акчалата бүләк тапшыру күздә тотыла.