Татарстанда «Ел укытучысы» Бөтенроссия бәйгесенең зона этабы башланды
Татарстанда «Ел укытучысы» Бөтенроссия бәйгесенең зона этабы башланды. Ул тугыз муниципаль районда уза һәм 15 февральдә төгәлләнә.
Бәйгенең зона этабында һәр укытучы дәрестән бер өзек һәм мастер-класс күрсәтәчәк.
Беренчеләрдән булып Теләче һәм Әтнә районнары мөгаллимнәре үзләренең педагогик осталыгын күрсәтте. Бүген конкурска Арча, Балтач, Кукмара районнары педагоглары да кушылды.
Быел министрлык тарафыннан ике номинация булдырылган: «Ел укытучысы» (педагогик стажы биш елдан да ким булмаган мөгаллимнәр өчен) һәм «Педагогик дебют» (педагогик стажы өч елдан да артык булмаган укытучылар өчен).
12-16 март көннәрендә «Ел укытучысы» номинациясендә 40 иң яхшы педагог һәм «Педагогик дебют» номинациясендә 20 мөгаллим бәйгенең республика этабында көч сынашуын дәвам итәчәк.
Республика этабының абсолют җиңүчесе сентябрь-октябрь айларында Санкт-Петербургта узачак Бөтенроссия конкурсының йомгаклау турында катнаша.