Татарстанда 12 укучы бердәм дәүләт имтиханыннан куып чыгарылган

Татарстан Республикасында бердәм дәүләт имтиханы вакытында 12 укучы БДИ үткәрү кагыйдәләрен бозган өчен куып чыгарылган. Аларга БДИ ны яңадан тапшыру хокукы да бирелмәде.
28 майда Татарстан Республикасы территориясендә биология, тарих, информатика һәм мәгълүмат-коммуникация технологияләре буенча БДИ узды. Имтиханны үткәрүдә 8 меңнән артык кеше катнашкан.
БДИ вакытында кәрәзле телефон куллану, белешмә материаллары һәм мәгълүматны тарату тупас тәртип бозу дип санала.
Имтихан тапшыру тәртибен бозучылар - ТР ның Арча, Чүпрәле, Мөслим, Әлмәт, Түбән Кама, Актаныш һәм Азнакай муниципаль районнары укучылары.
ТР Мәгариф һәм фән министрлыгы һәр очрак буенча тикшерү үткәргән, материаллар ТР Дәүләт имтихан комиссиясе каравына тапшырылган. ТР ДИК карары буенча имтихан тәртибен бозучыларның нәтиҗәләре яңадан тапшыру хокукы да бирелмичә юкка чыгарылган.
Тәртип бозучылар биология, тарих, информатика һәм мәгълүмат-коммуникация технологияләре буенча БДИ нәтиҗәләрен ссузларга һәм вузларга кергәндә куллану мөмкинлеген югалтты.