Татарстан Россия регионнары арасында рус телен белү буенча дүртенче булды

Фестивальне оештыручылар тарафыннан “Социаль навигатор” проекты кысаларында “Рус телен иң яхшы белгән регион” махсус номинациясе кертелгән иде. Нәтиҗәдә, рус телен яхшы белүчеләр яшәүче 10 регион җиңүче булды, рус телен белүгә үткәрелгән тест нәтиҗәләре буенча алар арасында Татарстан 4 урында тора.
Шулай ук “Педагогик осталык” һәм “Рус телен белүче” номинацияләрендә Татарстан вәкилләре дә җиңүче булды. Призерлар арасында (3 урын) – Казан 7-нче лицей-интернатның рус теле укытучысы Татьяна Ахматова һәм аның укучысы – 10 сыйныфта укучы Әмир Садыйков.
Тантаналы ябылу һәм җиңүчеләрне бүләкләү Мәскәүдә 6 июнь – Рус теле көнендә Дәүләт академия кече театрында үтте. Фестивальдә иң актив катнашкан регионны тәкъдим итүче буларак, ТР мәгариф һәм фән министры Альберт Гыйльметдиновка диплом тапшырылды.
Исегезгә төшерик, фестиваль ике этапта үтте. Дистанцион этап быел 20 февральдән 30 апрельгә кадәр уздырылды. Фестиваль сайтында бөтен Россиядән 37 мең 288 катнашучы теркәлде, алар арасында - 6 мең 516 татарстанлы. Оnlinе режимда түбәндәге күләмдә эшләр тапшырылды: РФ – 8 мең 334 эш, ТР – 1550 эш.
Фестиваль кысаларында 10 номинациядә конкурслар үткәрелде: рус телен белүче, педагогик осталык, фәнни тикшеренү, тел һәм мәдәният, XXI гасыр фикер иясе һәм ораторы, социаль реклама, журналистика, дизайнда рус сүзе, социаль проект, блогерның әдәби тормышы.
ТРдан 47 вәкил дистанцион этапның җиңүчесе булды, алар арасында мәктәп укучылары – 23 кеше, Фәнни-тикшеренү берләшмәләре укучылары, Урта һөнәри белем бирү, югары уку йортлары студентлары – 8 кеше, педагоглар – 16 кеше.
Фестивальнең төп этабы Мәскәүдә 3-6 июньдә үтте, һәм аның кысаларында конкурс чаралары, дискуссион мәйданнар, мәдәни-гаммәви чаралар, экскурсияләр, күргәзмәләр, мастер-класслар оештырылды.