“Мәгариф. Карьера-2013” 13 нче махсуслаштырыган күргәзмәсе ачылды

“Казан ярминкәсе” күргәзмәләр үзәгендә, уку һәм эш урыннарын тәкъдим итүче “Мәгариф. Карьера-2013” 13 нче махсуслаштырылган күргәзмәсе ачылды. Чарада ТР Дәүләт Советы Рәисе Фәрит Мөхәммәтшин, ТР Мәгариф һәм фән министры Энгель Фәттахов, ТР Хезмәт, мәшгульлек һәм социаль яклау министры Айрат Шәфигуллин, ТР Дәүләт Советының Икътисад, инвестицияләр һәм эшмәкәрлек буенча комитет рәисе Марат Галиев һәм башкалар катнашты.
Фәрит Мөхәммәтшин чыгышында билгеләп узганча, әлеге традицион күргәзмә, мәгариф тармагы вәкилләрендә, товар җитештерүчеләрдә, профсоюз вәкилләрендә зур кызыксыну уятуын күрсәтә. Бу күргәзмәнең әһәмиятен Фәрит Мөхәммәтшин, республика Президентының Дәүләт Советына еллык Юлламасында билгеләгән глобаль бурычны хәл итәргә ярдәм итүендә күрә. Ул искәртеп үткәнчә, республика алдында 2016 нчы елга, ТР товар җитештерүчеләре һәм хезмәт күрсәтүчеләре тарафыннан 2 триллион сумнан артык күләмдә товар җитештерү бурычы тора. “Шушы бурычны хәл итү, зур чылбырның барлык өлешләренең җитди тырышлыгын таләп итә. Мәктәп, башлангыч белем бирүче уку йортлары, техникум, югары уку йортларыннан башлап, халык хуҗалыгы тармагында эшләүчеләр, товар җитештерүчеләр – һәммәсенең дә яшь кадрларны әзерләү мәсьәләсендә тыгыз хезмәттәшлеге таләп ителә. Республиканың көндәшлеккә сәләтлелеген арттыру – мондый күргәзмәләр мәйданында өстенлекле мәсьәләләрнең берсе”, - дип ассызыклады парламент җитәкчесе.
Энгель Фәттахов күргәзмәнең, бер мәйданда уку йортлары, товар җитештерүчеләр, эш белән тәэмин итүче оешмалар туплануы белән кызыклы һәм файдалы булуына игътибарны юнәлтте. Айрат Шәфигуллин шәрехләп үткәнчә, “карьера” төшенчәсе хәзерге көндә популяр сүзләрнең берсенә әйләнде. “Һәр кеше карьера төзүне кайгырта, бу гомер юлында бик катлаулы процесс. Бу күргәзмә-ярминкәне оештырып, укучыларга, ата-аналарга зур ярдәм күрсәтәбез дип саныйбыз. Иң мөһиме, башта нинди һөнәр кызыклы булуына төшенү, аннан соң гына, шул юнәлеш буенча укырга керү”, - дип белдерде Айрат Шәфигуллин.
Тантаналы ачылыштан соң, рәсми затлар күргәзмәне тәшкил итүче 120 дән артык экспонат: югары уку йортлары, белем бирү үзәкләре, урта һөнәри белем бирүче уку йортлары, халык мәшгульлеге үзәкләре, кадрлар агентлыклары, нәшриятлар һәм башкаларның ирешкән казанышлары, төрле эшләнмәләре, инновацияле проектлары, укыту программалары, булачак һәм бүген эшләргә әзер булган белгечләр өчен вакансияләр һәм курслар белән танышып чыкты.
ТР Мәгариф һәм фән, ТР Хезмәт, мәшгульлек һәм социаль яклау министрлыклары һәм Казан мэриясе ярдәме белән оештырылган күргәзмә 5 нче апрельгә кадәр эшләячәк.