Казан укучылары "Салават Күпере" торак комплексында яңа паркта шомырт үсентеләре утырттылар

2021 елның 24 сентябре, җомга

188-нче номерлы «Бионика» лицее һәм 189-нчы номерлы «Заман» гимназиясе укучылары яңа паркта 15 шомырт үсентесе утырттылар. Гомумән алганда, биредә 400 эре үсемлек – тирәкләр, өрәңгеләр, алмагачлар, каеннар һ.б. утыртылачак. Мәктәп укучылары белән акциядә Казан мэры Илсур Метшин да катнашты.

Шәһәр башлыгына агачлар утыртырга 188-нче номерлы лицейның 8 «А» сыйныфы укучысы Азамат Ильясов һәм 189-нчы номерлы «Заман» гимназиясенең 10 «А» сыйныф укучысы Айдар Сәлахов булыштылар. Мәктәп укучылары, элек сазлык булган урында төзелә торган паркны төзекләндерүгә үз өлешләрен кертергә шат булуларын белдерделәр.