Казанда яшь укытучыларны «Укытучы» һөнәренә багышлау тантанасы узды
2025 елның 2 октябрендә КФУның Филология һәм мәдәниятара багланышлар институты базасында яшь укытучыларны «Укытучы» һөнәренә багышлау тантанасы узды.
Чарада республика мәктәпләрендә беренче тапкыр хезмәт эшчәнлегенә керешүче педагогик көллият һәм югары уку йортларын тәмамлаучы 200 яшь укытучы, шулай ук аларның остазлары, мәгълүмат-методика бүлек башлыклары, профсоюз оешмалары җитәкчеләре, югары, һөнәри һәм өстәмә һөнәри белем бирү оешмалары вәкилләре катнашты.
Багышлау программасында Татарстан Республикасы “Белем” мәгариф музее белән танышу, педагогика остаханәләрендә эшләү һәм “Укытучы” һөнәренә багышлау тантанасында катнашу каралган иде.
Татарстан Республикасы мәгариф һәм фән министры Илсур Һадиуллин Татарстан Республикасы Рәисе Рөстәм Миңнехановның яшь укытучыларга мөрәҗәгатен укыды һәм яшь белгечләргә фатиха сүзләрен җиткерде.
Тантана яшь педагогларның гимнын башкару белән тәмамланды.