2012-2013 уку елында Татарстан мәктәпләрендә коррупциягә каршы 1500 ләп чара оештырылган

9 нчы декабрь – Бөтендөнья коррупциягә каршы көрәш көне. Шул уңайдан “Татар-информ” мәгълүмат агентлыгы студиясендә ТР Мәгариф һәм фән министрының беренче урынбасары Данил Мостафин, ТР Президентының коррупциягә каршы сәясәт мәсьәләләре буенча идарәсенең оештыру бүлеге мөдире Алексей Панкратов, ТР Президенты каршындагы коррупциягә каршы көрәш буенча совет әгъзасы Игорь Бикеев катнашында матбугат конференциясе узды. Бу, агымдагы елда Татарстанда, коррупциягә каршы алып барылган эшчәнлеккә багышланган матбугат очрашуларын җөпләп оештырылган йомгаклау матбугат конференциясе булды.
Данил Мостафин коррупция исемле социаль явызлыкка каршы тискәре мөнәсәбәтнең кечкенәдән үк сеңдерелергә тиешлеге ассызыклады. Ул хәбәр иткәнчә, республиканың белем бирү системасында 4 уку-методик пособие кулланыла. “Без коррупциягә каршы чараларның мониторингын алып барабыз. 2012-2013 уку елларында Татарстан мәктәпләрендә 1,5 меңнән артык коррупциягә каршы махсуслаштырылган чара үткәрелгән. Алар укучыларга коррупциянең ничек тууын, аның нидә чагылыш табуын һәм тискәре нәтиҗәләре турында аңлатуга йөз тоткан. Коррупция һәм аңа карата тискәре мөнәсәбәт формалаштыру белән бәйле материаллар мәктәпләрдә төрле формаларда күтәрелде, һәм алар аеруча тарих, җәмгыять белеме, хокук белеме, икътисад дәресләрендә еш кулланыла. Дәресләрдә генә бу теманы колачлап бетереп булмаганлыктан, дәрестән тыш эшчәнлеккә дә зур игътибар юнәлтелә башлады. Болар балаларның яшенә карап, дискуссия клублары, конференцияләр, социаль проектлар һәм башкалар. Болар барысы да коррупциягә каршы эшчәнлек алып баручы тиешле структураларны җәлеп итү рәвешендә тормышка ашырыла”, - дип билгеләп узды Данил Мостафин.
Аның сүзләренә караганда, тематик тәрбия чаралары сыйныф сәгатьләрендә дә уздырыла. Аерым алганда, төрле иҗади конкурслар: иң яхшы стенгазетага, иң яхшы социаль роликка бәйгеләр, диспутлар, уен формасында брифинглар үткәрелә. ТР Мәгариф һәм фән министрының беренче урынбасары әйтүенчә, бүген бу конкурсларга йомгак ясалачак. Кагыйдә буларак, 2011 нче елдан оештырылып килүче мондый бәйгеләргә ноябрь-декабрь айларында нәтиҗә чыгарыла. Данил Мостафин “Илнең киләчәге – минел кулда” Республика иҗади эшләр конкурсы үткәрелүен, 5-11 класслар арасында “Коррупциягә “юк” дип әйтик” бәйгесенә быел материалларның 10 телдә тапшырылуын хәбәр итте. Балалар рәсемнәре конкурсына 1-4, 5-9 сыйныф укучылары үз иҗат җимешләрен тәкъдим итә. 2012 нче елдан башлап, Республика фәнни эшләр конкурсы гамәлгә кертелде, анда вуз һәм ссузлар да актив катнаша. Данил Мостафин “Диалектика: коррупциягә каршы көрәш” Бөтенроссия фәнни-гамәли конференциясе үткәрелүен искәртеп үтте. Анда Беларусь, Казакъстан, Кыргызстаннан яшь галимнәр, педагоглар, фәнни хезмәткәрләр – барлыгы 200 дән артык кеше катнашкан. “Быел яңа бәйге барлыкка килде. Ул студентлар арасында иң яхшы плакатка һәм иң яхшы анимацион роликка уздырылды. Бүген аңа да йомгак ясалачак”, - дип билгеләп узды Данил Мостафин.