Татарстан укытучыларының август киңәшмәсе 13 августта Чаллыда узачак
Яр Чаллыда 13 августта педагогик хезмәткәрләрнең республика август киңәшмәсен уздыру планлаштырыла. Бу хакта аппарат киңәшмәсендә шәһәр мэры Наил Мәһдиев хәбәр итте.
Республика форумыннан соң Чаллыда шәһәр август конференциясе узачак. Анда гадәттәгечә мәгариф системасы эшенә йомгак ясалачак һәм тармакның иң яхшы вәкилләрен билгеләячәкләр.
Мэр сүзләренчә, чара кысаларында шәһәрнең иң яхшы мәгариф учреждениеләренә премияләр тапшырылачак. Иң яхшы мәктәп, иң яхшы гимназия һәм иң яхшы балалар бакчасы Наил Мәһдиев исеменнән акчалата бүләкләнәчәк. Шулай ук педагогларны һәм мәгариф оешмалары җитәкчеләрен бүләкләячәкләр.
«Рәхмәт әйтергә урын бар. Яхшы эшләүчеләр, һичшиксез, мораль яктан гына түгел, матди яктан да бүләкләнергә тиеш», – дип ассызыклады Мәһдиев.
Ул билгеләп үткәнчә, премия фонды күләме узган еллар дәрәҗәсендә калачак.