Энгель Фәттахов: WorldSkills Russia чемпионатын үткәрү, эшче һөнәре абруен күтәрү өчен этәргеч бирәчәк

Казанда WorldSkills Russia-2014 һөнәр осталыгы буенча икенче Милли чемпионатны үткәрү, эшче һөнәре абруен күтәрү өчен этәргеч бирәчәк, дип белдерде ТР Премьер-министры урынбасары – мәгариф һәм фән министры Энгель Фәттахов. Милли чемпионат 35 һөнәр буенча уза, дип искәртте ул. Узган ел ул 25 һөнәр буенча Тольяттида узган. Э.Фәттахов сүзләренә караганда, чемпионат үткәрү нәтиҗәсендә, ярыш мәйданчыкларына килгән укучылар һәм чыгарылыш сыйныф укучылары төрле һөнәр вәкилләре эшенең үзенчәлекләрен күрә һәм теге яки бу белгечлек турында яңалык белә ала.
Республика икътисадын үстерү өчен урта звено кадрларын әзерләү бигрәк тә мөһим мәсьәлә булып тора, дип ассызыклады Э.Фәттахов. “Татарстан Президенты тарафыннан бу кадрларны сыйфатлы әзерләү бурычы куелды. Моның өчен республика территориясендә 20-25 ресурс үзәк ачу планлаштырыла. Быел шундый 8 ресурс үзәген ачу ниятләнә”, - дип билгеләп үтте ТР мәгариф һәм фән министры.
Ресурс үзәкләре урта һөнәри белем бирү учреждениеләре базаларында оештырылачак. “Эш белән тәэмин итүчеләр белән бергә көчле матди-техник база, лаборатория оештырылачак һәм белем бирү программасы төзеләчәк. Кадрларга башлангыч һәм урта һөнәри белем биреләчәк, шулай ук кыска вакытлы курслар оештырылачак. Шулай итеп, ресурс үзәге эш белән тәэмин итүчеләрне бөтен юнәлешләр буенча кадрлар белән тәэмин итәчәк”, - диде Э.Фәттахов.
“WorldSkills Russia чемпионатын яхшы уздыру һәм 2019 елда эшче һөнәрләр буенча дөнья чемпионатын үткәрүгә заявка бирү кампаниясендә катнашу – безнең бурыч”, - диде республиканың мәгариф һәм фән министры.
Искәртеп узабыз, Татарстан башкаласында кичә WorldSkills Russia-2014 һөнәр осталыгы буенча икенче Милли чемпионат ачылды. Ачылыш тантанасында Россия Хөкүмәт Рәисе урынбасары Ольга Голодец һәм ТР Премьер-министры Илдар Халиков катнашты.