“Future Skills” Халыкара белем бирү форумы үз эшен башлап җитәрде

Бүген Казанның Идел буе дәүләт физик культура, спорт һәм туризм академиясендә “Future Skills” Халыкара белем бирү форумы ачылды.

Әлеге чара Казанда 22 һәм 23 май көннәрендә уздырыла. Анда “WorldSkills International” халыкара хәрәкәте илләре вәкилләре, “WSI” милли оешмалары җитәкчеләре, бу өлкә белән кызыксынган галимнәр һәм экспертлар, бизнес вәкилләре чакырулы. Форум РФ Мәгариф һәм фән министрлыгы, Стратегик инициативалар агентлыгы һәм ТР Хөкүмәте тарафыннан гамәлгә ашырыла.

Форумның пленар утырышын ТР Премьер-министры урынбасары - ТР мәгариф һәм фән министры Энгель Фәттахов ачып: “Республикабыз башкаласында дөнья дәрәҗәсендә булган бу чараның уздырылуы белән без горурланабыз. Форум тәҗрибә уртаклашу, бигрәк тә икътисади өлкәдә файдалы сөйләшүләр алып бару, эшче һөнәрләре белән бәйле нәтиҗәле карарлар кабул итү мәйданы булачак, - диде. Министр Татарстанның Россиядә тоткан урыны, мәгариф, авыл хуҗалыгы, төзелеш өлкәсендә булган уңышлары белән бүлеште. – Татарстанның 2030 елга кадәр булган стратегик үсеш планында кеше капиталы республиканың иң төп байлыгы булып тора. Белем бирүне инвестицияләү исә төбәкнең үсешен күрсәтә. Татарстан, дөрестән дә, белем бирүгә бик зур игътибар бирә һәм Россиядә алдынгылардан санала”, - диде Э. Фәттахов.

Ул шулай ук эшче һөнәрләрне популярлаштыру өлкәсендә башкарыла торган эшләр хакында да бәян итте. Эшче һөнәрләре заман таләпләренә туры килсен дисәк, инновацион технологияләрне яхшы үзләштерергә һәм халыкка югары хезмәт күрсәтергә кирәк. Моның өчен бизнес вәкилләре һәм мәгариф системасы үзара хезмәттәшлек итә ала торган мәйданчыклар булдыру мөһим. Республикада эшсезлек иң түбән дәрәҗәдә булуга карамастан, хезмәт базарында үзгәрешләр кертү кирәк. Татарстанда, эшче һөнәрләрен үстерү максатыннан, барлыгы 1 миллиард сумнан артык акча тотыла, өстәмә инвестицияләр исә якынча 300 миллион сумны тәшкил итә”, - дип белдерде министр. Аның сүзләренчә, 2020 елга кадәр Татарстанда, төрле өлкәдә хезмәт куючы кадрлар укытып чыгара торган 25 үзәк булдырылачак. Анда яңа кадрлар укыту белән генә түгел, ә квалификация күтәрү белән дә шөгыльләнәчәкләр.

Э. Фәттахов “Казан” халыкара аэропорты территориясендә төзеләчәк үзәк хакында да хәбәр итте. Әлеге үзәктә эшче һөнәрләренә өйрәтәчәкләр. Аны алдагы 2 елда ачу планлаштырыла. Биредә 2018 елда исә “WorldSkills” стандартлары буенча эшче һөнәрләре арасында чемпионат үткәреләчәк.

“Skills USA” башкарма директоры Тим Лауренс (АКШ) үз иленең сәнәгате, сәнәгатьнең хәле хакында сүз алып барды. Журналистлар белән аралашу вакытында ул АКШның икътисады, сәнәгате үсүен, шуңа бәйле рәвештә эш урыннары артуын ассызыклады. “Икътисадның глобаль булуын онытырга ярамый. Шуңа да мондый форумнарны уздыру бик мөһим. Без монда аралашабыз, фикер алышабыз. Казан да миңа бик ошады, халык монда бик кунакчыл, - диде ул. – Эшче һөнәрләргә килгәндә, яшьләр хәзер күбрәк IT- технологияләргә тартыла, менеджер һөнәрен күбрәк якын итә. Ә безнең максат исә аларга гына түгел, ә яшьләрнең әти-әниләренә дә эшче һөнәрләре хакында мәгълүмат бирү. АКШта, мисал өчен, энергетика өлкәсе бик нык алга киткән. Без яшьләрне шуңа җәлеп итәргә уйлыйбыз”.

Хезмәт министрлыгының һөнәри куркынычсызлык һәм сәламәтлек, хезмәт институты җитәкчесе Сан-Квей Линь (Кытай, Тайбей): “Форумда без дөньядагы социаль һәм икътисади үзгәрешләр һәм аларның эш базарына тәэсире хакында фикер алышырга ниятлибез. Әлеге үзгәрешләрне билгеләгәннән соң, аларны истә тотып, мәгариф өлкәсендә нинди яңалыклар кертергә кирәк икәнен ачыклый алачакбыз”, - диде. Ул эшче һөнәрләренең искиткеч күп һәм дөрес итеп бүленмәвен дә искәртте.

Сәнәгать секторы өчен кадрлар әзерләү юнәлеше хезмәте башкарма директоры Д-р Раймонд Пэтел (КАР): “Без форумга машина төзелеше, фән һ.б. өлкәләрдә тәҗрибә уртаклашу максатыннан килдек. Икътисад ягыннан караганда да, һәрвакыт заман белән бару өчен, яңалыкка омтылырга кирәк. Африкага да яңа энергия ресурсларын булдыру мөһим. Без атом-төш энергетикасын файдаланырга планлаштырабыз һәм Россия безгә бу юнәлештә төзелешләрдә ярдәм итәр дип уйлыйбыз”, - диде.

“Global Education Futures” директоры Павел Черных форумның киләчәк һөнәрләренә багышланачагын ассызыклады. “Хәзер дөньяда техник һәм социаль үзгәрешләр бик зур тизлек белән бара һәм төрле өлкәләрдә булган яңалыклар артыннан күзәтеп бетерү мөмкин түгел. Шуңа да кешеләрне мәгариф өлкәсендә нәрсәгә әзерләргә кирәклеген ачыклау мөһим. Форумга килүчеләр дә үзгәрүчән икътисадта нинди осталыклар кирәк булачагы хакында сөйләшәчәк”, - диде.

Форумда 30лап ил вәкиле катнаша. Иртәгә алар “Казан ярминкәсе” күргәзмәләр үзәгендә уздырылачак профессиональ осталык буенча “WorldSkills Russia” III илкүләм чемпионаты эшчәнлеге белән танышачак, кич исә “Татнефть арена” боз сараенда чемпионатның бүләкләү тантанасында катнашачак.