Казанда WorldSkills төбәкара компетенция үзәкләрен төзүгә 4 млрд сум акча бүленә

Казанда, WorldSkills халыкара чемпионатына әзерлек максатында, Россия Федерациясе дәрәҗәсендә җаваплылыкны бүлү концепциясе эшләнә, аның кысаларында төбәкара компетенция үзәкләре төзү каралган. Аларны булдыру өчен федераль бюджеттан 4 млрд сум акча бүленә. Бүген бу хакта ТР Премьер-министры Илдар Халиков катнашында узган киңәшмәдә ТР мәгариф һәм фән министры Энгель Фәттахов хәбәр итте.

"2016 елда 2019 елда узачак дөнья чемпионатына әзерлек өчен һөнәр блоклары буенча 6 төбәкара компетенция үзәге төзеләчәк. Бу - мәгълүмати технологияләр, транспорт хезмәте күрсәтү һәм логистика, сәнгать һәи дизайн, сервис һәм хезмәт күрсәтү өлкәсе, сәнәгый җитештерү, төзелеш. Федераль бюджеттан 4 млрд сум акча бүленде, бу бер елга 165 млн сум дигән сүз", - дип белдерде ул киңәшмәдә.

Э.Фәттахов сүзләренчә, төбәкләрне сайлап алу агымдагы елның октябрь-ноябрь аенда узачак. Төбәкләргә мәҗбүри таләп - партнерларча финанслашу һәм вузлар белән хезмәттәшлек. "Үзәкләр гамәлдәге белем бирү стандартлары нигезендә эшләячәк", - диде министр.

Ул билгеләп үткәнчә, Татарстанга IT-юнәлеш беркетелгән, аңа 11 һөнәр кергән. "Әлеге үзәкне Иннополис базасында урнаштыру мөмкинлеге карала", - дип хәбәр итте Фәттахов.

Энгель Фәттахов киңәшмәдә республика Премьер-министрына ТР командасын WorldSkills-2019 чемпионатына әзерләү программасы һәм әлеге хәрәкәтне һөнәри белем бирү системасында үстерүгә дәүләт программасы статусын бирү һәм аны тормышка ашыруны финанс белән тәэмин итү мөмкинлеген карау үтенече белән мөрәҗәгать итте.