ЯҢАЛЫКЛАР

24 апрельдән 26 апрельгә кадәр Санкт-Петербург шәһәрендә “Россиянең заманча мәктәпләренең проблемалары һәм перспективаларын үстерү” II нче Бөтенроссия белем бирү форумы һәм “Россиянең 100 иң яхшы мәктәбе” лауреаты бәйгесенең бүләкләү өлеше узды. Форумда Россиянең 900 белем бирү оешмалары (мәктәпләр, гимназияләр, лицейлар) катнашты.

Казан шәһәренең балалар техник иҗат үзәге базасында республика укучылары арасында гади судомодельләр ясау буенча шәхси-команда беренчелеге узды. 29 команда арасында Кукмара районының Поч.Сутер урта мәктәбе укучылары, беренче урынга чыгып, күчмә кубокка ия булды.

Җәмгыятьтә шактый таралыш алган коррупция очраклары белән өлкәннәр генә түгел, мәктәп укучылары да яхшы таныш. Аларның “проблемаларны акча ярдәмендә хәл итү”гә карата фикере тискәре – алар киләчәктә гадел тормыш алып барырга тели.

Казанда 4-6 июньдә туган теле рус булмаган мәктәп укучылары өчен рус теле буенча Халыкара олимпиада узачак. Олимпиада Татарстан Республикасы Мәгариф һәм фән министрлыгы тарафыннан Казан федераль университеты белән берлектә Татарстан Республикасы, Россия Федерациясе һәм СНГ субъектлары мәктәпләрендә рус телен укытуны камилләштерү, сәләтле һәм булдыклы укучыларны һәм иҗади эшләүче укытучыларны барлау һәм кызыксындыру максатыннан үткәрелә.

ТР Мәгариф һәм фән министрлыгы, ТР Мәгълүматлаштыру һәм элемтә министрлыгы, ТР “Мәгълүмати технологияләр үзәге” дәүләт унитар предприятиясе “АК БАРС” БАНК ачык акционерлык җәмгыяте һәм MasterCard Worldwide Халыкара түләү системасы белән берлектә Яшел Үзән шәһәренең аерым мәктәпләрендә “Мәктәп картасы” инновация проектын эшләтеп җибәрә.

Зәй шәһәренең 4нче мәктәбендә IX-XI сыйныф укучылары катнашында “Без - бергә” дип аталган парламент дәресләре үтте. Ул Кырымның Россиягә кушылуы темасына багышланды. Укучылар дәрестә әлеге территориягә кагылган тарихи вакыйгалар турында фикер алышты.

2014 елның 21 апреленнән 8 маена кадәр гомумбелем бирү оешмалары чыгарылыш сыйныф укучыларының дәүләт йомгаклау аттестациясен вакытыннан алдан бирү этабы узды. Татарстанда БДИны вакытыннан алдан 16 укучы тапшырды.

Россия Мәгариф һәм фән министрлыгында Россия Федерациясе субъектларының 2014-2019 елларга «Төбәкләрнең социаль-икътисади үсеше өчен эшче кадрлар әзерләү” проектын гамәлгә ашыруга юнәлдерелгән сынау программаларыннан конкурслы сайлап алу узды. РФ буенча тәкъдим ителгән 42 субъект арасыннан 10 сайлап алынды, алар арасында Татарстан Республикасы да бар.

30 апрельдә М.Җәлил исемендәге Татар дәүләт академия опера һәм балет театрында Татарстан Республикасы Президенты Рөстәм Миңнеханов, Татарстан Республикасы Премьер-министры урынбасары- мәгариф һәм фән министры Энгель Фәттәхов катнашында Татар теле һәм әдәбиятыннан II Халыкара олимпиаданың ябылу тантанасы узды.