Укытучылар һәм ата-аналар «Иң яхшы кинопедагог» конкурсында катнаша ала
31 мартка кадәр V нче «Иң яхшы кинопедагог» конкурсына гаризалар кабул ителә. Җиңүчеләр призлар алачак, ә иң яхшы тәҗрибәләр махсус җыентыкта бастырылачак. Конкурс Россия Мәгариф министрлыгы ярдәмендә Россия мәгариф академиясенең балачакны, гаиләне һәм тәрбияне өйрәнү институты тарафыннан оештырылган.
Катнашырга укытучылар, ата-аналар һәм белем бирү эшендә киноны куллана белгән активистлар чакырыла. Моның өчен zeroplus.tv сайтында теләсә нинди фильм яки мультфильм сайларга кирәк, аның нигезендә кинодәрескә, чарага методик материаллар эшләргә яки кино-уен уйлап табарга, үз эшеңне болыт сервисына йөкләргә һәм сылтама буенча гариза тутырырга кирәк.
Конкурс түбәндәге номинацияләрне үз эченә ала: «Кече мәктәп яшендәге балалар өчен иң яхшы кино-дәрес», «Урта мәктәп яшендәге балалар өчен иң яхшы кино-дәрес», «Өлкән яшьтәге балалар һәм студентлар өчен иң яхшы кино-дәрес», «Иң яхшы кино-уен», «Балалар лагере өчен иң яхшы кино-чара».
Гаризалар 31 мартка кадәр кабул ителә, конкурс нәтиҗәләре май аена ясалачак. Конкурс белән бәйле сорауларны kino.pedagogika@gmail.com почтасына җибәрергә мөмкин.