Татарстанның яшь педагогларын укытучы һөнәренә багышлаячаклар
12 августта Татарстан мәгариф хезмәткәрләренең республика август киңәшмәсе кысаларында Яшел Үзән муниципаль районының В.В. Карпов исемендәге лицей базасында яшь педагогларны «Укытучы» һөнәренә багышлау узачак.
Багышлау программасында белем бирү процессында катнашучыларны психологик яктан тәэмин итү буенча остазлар белән төркемле укыту чаралары каралган, яшь педагогларның ТР Мәгариф һәм фән министры Илсур Һадиуллин белән традицион очрашуы булачак. Яшь укытучылар министрга үзләрен кызыксындырган сорауларын бирә алалар.
Секциянең мөһим чараларының берсе - вуз тәмамлаучыларны «Укытучы» һөнәренә багышлау тантанасы.
Тантана укытучының социаль статусын һәм педагогик һөнәрнең абруен күтәрү, яшь һәм креатив педагогның һөнәри үсеше һәм аны үстерү, татарстанлыларның яңа буынын тәрбияләүдә ролен ныгыту максаты белән үткәрелә.
Тантанада мәгариф системасының 250дән артык вәкиле – республика мәктәпләрендә беренче тапкыр хезмәт эшчәнлегенә керешүче яшь укытучылар, остазлар, республиканың муниципаль методик хезмәтләре, профсоюз оешмалары җитәкчеләре, Россия Мәгариф министрлыгы академиясе, Россия мәгариф академиясе, Россия Федерациясе төбәкләре, югары, һөнәри һәм өстәмә һөнәри белем бирү оешмалары вәкилләре катнашачак.
2022 елның сентябреннән республика мәктәпләрендә эшкә керешүче барлык чыгарылыш сыйныф укучылары исеменнән яшь педагоглар өч телдә (рус, татар һәм инглиз) ант бирәчәкләр.
Тантана яшь педагоглар гимны белән тәмамланачак.
Чара кысаларында Вконтакте социаль челтәрендә яшь педагогларның һөнәргә багышланган эше каралган, анда катнашучылар тарафыннан фото - һәм видеоматериаллар урнаштыру күздә тотыла.
Чара «Зөя утрау-шәһәрчеге»нә экскурсия белән тәмамланачак.