Казанда үзенчәлекле балалар өчен мәктәп сыйныфларын җиһазландырачаклар
Татарстан башкаласында 45 мәктәптә сәламәтлек мөмкинлекләре чикләнгән балалар укый торган 136 кабинет ремонтланачак һәм җиһазландырылачак. Биш ел элек мондый сыйныфлар белән 34 мәктәп кенә җиһазландырылган иде. Казан мэры Илсур Метшин Казан шәһәре Думасының XV сессиясендә Ратушада әлеге эшкә аерым игътибар бирергә кушты.
"Якындагы 2-3 елда бу кабинетларны кирәкле җиһазлар белән җиһазландырырга кирәк. Бу-үзенчәлекле балалар һәм аларга аерым мөнәсәбәт кирәк", - дип ассызыклады шәһәр башлыгы.
Башкарма комитет җитәкчесенең социаль мәсьәләләр буенча урынбасары Гүзәл Сәгыйтова хәбәр иткәнчә, Татарстан башкаласында барлыгы тугыз дәүләт коррекция мәктәбе эшли.
"Бүгенге көндә балаларның ихтыяҗларын исәпкә алып, 45 мәктәптә 136 кабинетны ремонтларга һәм яңадан җиһазландырырга кирәк, алар махсус парталар, сенсор бүлмәләре һәм башка махсус җиһазлар белән җиһазландырылачак", — дип хәбәр итте Сәгыйтова.
312 муниципаль балалар бакчасында, 26 шәхси балалар бакчасында, 10 мәктәпкәчә бүлектә, ике прогимназиядә, бер дәвалау педагогикасының һәм дифференциацияләнгән укытуның үзәгендә зур коррекция эше алып барыла. Бүгенге көндә 10 меңнән артык бала өчен төрле нозология буенча 655 төркем ачылды, анда мәктәп яшенә кадәр балаларның күпчелеге үсеше нормага кадәр төзәтелә, дип өстәде Башкарма комитет җитәкчесе урынбасары.