«Шефлар көрәше»: Казанда мәктәп ашханәләренең иң яхшы пешекчеләрен билгеләделәр
Татарстан башкаласында “Шефлар көрәше” мәктәп ашханәләре мөдирләре арасында һөнәри осталык конкурсы узды. Иң яхшы исем өчен сигез оста көрәште. Конкурста 122 нче мәктәп ашханәсе мөдире Альбина Куликова җиңүче булды. Икенче урынны - 18 нче гимназиядән Гөлсинә Идиятуллина, өченче урынны ике катнашучы: Рәфис Салихҗанов (36 нчы гимназия) һәм Айгөл Гарифуллина (83нче лицей) алды.
Ярышны Казан сәүдә-икътисадый техникумы ярдәмендә Казанның Азык-төлек һәм социаль туклану департаменты оештырды.
Ярыш өч сынаудан тора. Ашханә мөдире җитәкчелегендә тәҗрибәле пешекче һәм максатчан укучы студент теоретик белемнәрне тикшерергә, ризык әзерләү күнекмәләрен күрсәтергә, шулай ук сынауларда игътибарлылык һәм креативлыкны кулланырга тиеш иде.
Конкурста катнашучыларның эшләре ризыкларның тәме, файдасы, шулай ук нормаларның үтәлеше һәм стандартлар буенча бәяләнде.