«Иң яхшы мәктәп ашханәсе - 2025» бөтенроссия конкурсында Татарстан мәктәпләре аерылып торды

2025 елның 1 ноябре, шимбә

28 октябрьдән 30 октябрьгә кадәр Ленинград өлкәсендә «Югары пилотаж» мәгариф үзәгендә «Иң яхшы мәктәп ашханәсе - 2025» V юбилей Бөтенроссия конкурсы узды.

Татарстан Республикасы үзенең мәгариф оешмаларын федераль дәрәҗәдә лаеклы тәкъдим итте. Яр Чаллы шәһәренең А.С. Пушкин исемендәге 78 нче лицей вәкилләре «Иң яхшы шәһәр мәктәбе - 2025» номинациясендә 3 нче урынны яуладылар.

Татарстан Республикасы Яшел Үзән муниципаль районының С.К. Гыйматдинов исемендәге Осиново гимназиясе «Авыл мәктәбенең иң яхшы ашханәсе» номинациясендә конкурс лауреатлары булдылар.

Командаларны котлыйбыз һәм алга таба да яңа казанышлар һәм яшь буынны тәрбияләү һәм сәламәтләндерү эшендә уңышлар телибез!