Казанда «Спорт-сәламәтләндерү һөнәрләре дөньясы» инклюзив фестивале узды

2025 елның 5 декабре, җомга

30 ноябрьдә Казанның Ишкәкле спорт төрләре үзәгендә «Спорт-сәламәтләндерү һөнәрләре дөньясы» инклюзив фестивале узды. Чараны 2024 елда Россия махсус Олимпиадасының Татарстан республика бүлеге тарафыннан гамәлгә ашырылган «Махсус тренерның инклюзив академиясе» проекты төгәлләде.

Фестивальнең төп вакыйгасы һөнәри күнекмәләр конкурсы булды, анда катнашучылар үзләренең остаз-тренерлары белән флорбол, бию спорты һәм нейрогимнастика буенча ачык дәресләр үткәрде. Бер үк вакытта физик культура һәм спорт өлкәсендә менталь җитешсезлекләре булган затларны һөнәри эш белән тәэмин итү һәм эшкә урнаштыру перспективаларына багышланган түгәрәк өстәл узды.