Экология буенча бөтенроссия олимпиадасында Татарстанның 8 укучысы җиңүче исеменә лаек булды

4 апрельдә Казанның “Пирамида” мәдәни-күңел ачу комплексында экология буенча бөтенроссия укучылар олимпиадасы җиңүчеләрен бүләкләделәр. Тантанада ТР Премьер-министры урынбасары – мәгариф һәм фән министры Энгель Фәттахов, ТР экология һәм табигый байлыклар министры Артем Сидоров катнашты.
Олимпиаданың финал турында Россиянең 50 субъектыннан төбәк этабы җиңүчеләре – барлыгы 250 ләп укучы катнашкан. Экология буенча укучыларның бөтенроссия олимпиадасы башкалардан шунысы белән аерылып тора: теоретик турдан тыш, катнашучылар үз тикшеренү проектлары презентациясе белән чыгыш ясаган. 30 март – 4 апрель көннәрендә узган Олимпиада сынаулары Казан федераль университеты базасында үткәрелгән.
ТР Премьер-министры урынбасары-мәгариф һәм фән министры Энгель Фәттахов сәләтле балалар белән эшчәнлекнең Мәгариф һәм фән министрлыгы эшчәнлегендә өстенлекле юнәлеш булуы ассызыклады. “Без мондый балалар белән шөгыльләнергә тиеш. Алар - безнең киләчәгебез. Татарстан укучылары барлык илкүләм олимпиадаларда җиңәргә тиеш дигән бурыч куелган. Татарстанда, бу максатка ирешү өчен, күп эш башкарыла. Казанда фән олимпиадаларына әзерлек үзәген булдыру эше төгәлләнеп килә”, - дип белдерде министр. Аның сүзләренә караганда, экология буенча олимпиадада 15 укучы катнашкан, шуның 8е җиңүче, 6сы призер. “Бу бик зур нәтиҗә”, - дип, Энгель Фәттахов шушы балаларны әзерләгән КФУ профессорларына рәхмәтен җиткерде. Ул, узган ел белән чагыштырганда, экология буенча җиңүчеләрнең 2 тапкыр күбрәк булуын билгеләп үтте.
Министр әйтүенчә, узган елда бөтенроссия олимпиадалары нәтиҗәләре буенча Татарстан гомуми зачет буенча, Мәскәү һәм Санкт-Петербургтан соң, өченче булган.
Экология буенча илкүләм олимпиадада 9 нчы сыйныфлар арасында Владимир Каширин, Анастасия Кочнева, 10 нчы сыйныфлардан Константин Никашин, Тимофей Чазов, 11 нче сыйныфлар арасында Илназ Шаяхмәтов һәм Дарья Цинеккер җиңүче исемен яулады. Ксения Зарипова, Кирилл Лемазин, Алинә Гәрәева, Илья Мильгизин, Федор Индейкин, Глеб Крассовский призер исеменә лаек булды.
Моннан тыш, ТР Мәгариф һәм фән министрлыгы максималь балл җыйган җиңүчеләр өчен махсус призларны гамәлгә куйган. Артем Хан (Сахалин өлкәсе), Мария Никитина (Удмуртия), Анастасия Старкова (Мәскәү), Татарстаннан Михаил Карповка Энгель Фәттахов бүләкләр тапшырды.
ТР экология һәм табигый байлыклар министры Артем Сидоров Олимпиадада катнашучыларны сәламләп, педагогларга рәхмәтен җиткерде. Ул кеше яшәеше һәм көнкүрешенең барлык өлкәләренең экология мәсьәләләре белән бәйле булуын билгеләп үтте. “Табигатькә мөнәсәбәт җәмгыять дәрәҗәсенең, аның өлгерлегенең индикаторы булып тора. Татарстан Президенты тарафыннан республиканың алдагы үсешенең мөһим векторлары билгеләнгән – кешегә яшәү өчен уңайлы шартлар тудыру”, - дип белдерде министр.

Фото: eco.tatarstan.ru сайтыннан