Казанда илнең иң яхшы 100 остазын билгеләячәкләр
11-18 октябрь көннәрендә Татарстан Республикасы башкаласында «Быть, а не казаться! – 2025» Бөтенроссия остазлар конкурсының финалы уза.
Конкурсның максаты - балаларны һәм яшьләрне гражданлык-патриотик тәрбияләү эшендә остазлык һәм эзлеклелек системасын үстерү, шулай ук буыннар арасындагы элемтәләрне ныгыту.
Конкурс Россия Федерациясе Президенты йөкләмәсе буенча икенче ел рәттән Роспатриотцентр тарафыннан уздырыла. Быел конкурска Россиянең барлык төбәкләреннән 70 мең кеше гариза биргән.
Казандагы зур финал биш номинациядә илнең иң яхшы 100 остазының исемнәрен билгеләячәк.
Ачылу тантанасы 11 октябрьдә танылган артистлар һәм җәмәгатьчелек фикере лидерлары катнашында узачак. Алар арасында - Татарстан Республикасы Премьер-министры урынбасары Ләйлә Фазлыева, “Роспатриотцентр” федераль дәүләт бюджет учреждениесе директоры Елена Беликова, “Россия остазлары” балалар һәм яшьләр остазларының Бөтенроссия иҗтимагый хәрәкәте башкарма директоры Андрей Самотоин, шулай ук “ВОИН” яшьләрне хәрби-спорт әзерлеге һәм патриотик тәрбияләү үзәге директоры - Дмитрий Шевченко.
Финалга чыгучыларның исемнәре 17 октябрьдә Татарстан башкаласында узачак бәйгене ябу тантанасында билгеле булачак.