Быел татар теле буенча сөйләм практикасы кулланылачак төбәкара чатыр лагере эшләячәк

Быел ТР Мәгариф һәм фән министрлыгы мәктәп укучылары өчен җәйге ял кысаларында 15 профильле смена әзерләгән. Алар арасында быел гына эшли башлаячак яңа юнәлешләр дә бар. Алар хакында ТР Министрлар Кабинетында узган брифингта ТР мәгариф һәм фән министры урынбасары Светлана Гыйниятуллина сөйләде.
Яңа сменаларга килгәндә, физик тәрбия һәм тарих буенча олимпиадага әзерлек буенча республика профильле сменасына 100 бала җәлеп ителәчәк. Республиканың филологик профильле сменасы 80 баланы кабул итәчәк. “Дрим-Тим” яшь тикшеренүчеләр сменасы - 150 баланы, геологик профильле сменасы 310 баланы колачлый. Информатика буенча укучыларның бөтенроссия олимпиадасында катнашуга әзерлеге буенча 6-9 сыйныфларда укучылар өчен белем бирү сменасы 50 балага, Алабуга муниципаль районы “Буревестник” лагере базасында Республика җәйге фәнни-белем бирү мәктәбе шулай ук 50 балага исәпләнеп оештырыла.
Светлана Гыйниятуллина татар теле буенча сөйләм практикасы кулланылачак төбәкара чатыр лагере эшчәнлегенә җентекләп тукталды. Спас муниципаль районы базасында узачак сменага Россиянең төрле төбәкләрендә, ерак һәм якын чит илләрдә яшәүче 1000 татар баласы чакырылган. Әлеге профильле сменаның максаты – татар халкы мәдәнияте, бүгенге Татарстан белән якыннан танышу, татар теле буенча сөйләм практикасын оештыру. “Төбәкара смена олимпиада, иҗади конкурс, фестиваль, спорт чараларында җиңүчеләрдән туплана”, - дип белдерде министр урынбасары. Сөйләм практикасы татар телен белү дәрәҗәсенә карап оештырыла. Программада балаларны татар халык йолаларына, традицияләренә җәлеп итүгә йөз тоткан чаралар каралган. Бу, укудан тыш, милли чигү, вокал, милли бию кебек юнәлешләр буенча түгәрәкләр, Казан һәм Татарстанның тарихи урыннарына экскурсияләр һәм башкалар.
Светлана Гыйниятуллина билгеләп үткәнчә, ТР Яшьләр эшләре һәм спорт министрлыгы белән берлектә, укуда, балалар иҗатында, спортта һәм балалар хәрәкәтендә югары нәтиҗәләргә ирешкән 650 бала өчен республиканың 6 профильле сменасы оештырылган.