Дмитрий Ливанов БДИ системасына кертелүе ихтимал булган үзгәрешләр турында бәян итте

Бүген Казанда Россия төбәкләрендә мәгариф өлкәсе белән идарә итүче җитәкчеләр киңәшмәсе узды. Аның эшендә ТР Президенты Рөстәм Миңнеханов, РФ мәгариф һәм фән министры Дмитрий Ливанов, илнең 81 субъектыннан вәкилләр, шул исәптән Кырымнан белгечләр, катнашты.
Дмитрий Ливанов мәктәпне тәмамлаучылар өчен Бердәм дәүләт имтиханнары системасындагы үзгәрешләр турында бәян итеп, яңа уку елына төп бурычлар билгеләнгән докладын тәкъдим итте.
Министр Бердәм дәүләт имтиханнарын тапшырган вакытта инша язуны гамәлгә кертү ниятләнүе турында хәбәр итте. “Мондый формат балаларда үз фикерен дөрес һәм үтемле итеп язмача җиткерә белү, үз фикерен белдереп, дәлилләү аргументларын табу сәләтен формалаштыра”, - дип саный ул.
Тагын бер мөһим яңалык, ул да булса, укучыларның төрле индивидуаль, шул исәптән укудан тыш казанышларын исәпкә алу. Сүз югары уку йортына кергәндә укучының портфолиосын тәкъдим итү турында бара. “Мондый тәҗрибә күп кенә илләрдә кулланыла, шул ук вакытта, без тапшырылачак материалларда ялган фактлар кертелү ихтималлыгын да аңлыйбыз”, - дип белдерде Дмитрий Ливанов. Аның әйтүенчә, портфолио системасын керткәнчә, мөмкин булган рискларны контрольдә тоту буенча җитди эш алып барырга кирәк булачак. “Рискларны федераль, шулай ук төбәк дәрәҗәсендә олимпиадалар, конкурс, ярышлар, конференцияләр реестрын куллану бәрабәренә киметергә мөмкин дип саныйбыз. Киң җәмәгатьчелек өчен мәгълүмати ачыклык, үтә күренмәлелек булырга тиеш”, - диде ул.
Министр билгеләп узганча, шулай ук рус теле һәм математика буенча имтиханнарда төп һәм профильле дәрәҗәләрне кертү ниятләнә. “Төп дәрәҗә “зачет” яки “незачет” схемасы буенча бәяләнеп, мәктәп аттестаты өчен җитәрлек булачак. Ә профильле дәрәҗә шул юнәлештәге вузларга керү өчен зарур. Бу система тулысынча эшләнгәч, без аңа күчәчәкбез. Әле бу киләсе уку елында гына булмас, мөгаен, моңа ныклап әзерләнергә кирәк”, - дип ассызыклады Дмитрий Ливанов.
Министр быел күп кенә мәктәпләрдә укучыларның әзерлек дәрәҗәсе белән бәйле җитди проблемалар ачыкланганын билгеләп узды. Ул ассызыклаганча, Бердәм дәүләт имтиханы буенча түбән күрсәткечләр теркәлгән мәктәпләрне тәнкыйтьләп, җәзасын бирергә түгел, ә тирән анализ ясарга кирәк.
Ливанов иминлеге какшаган гаиләләрдә тәрбияләнүче балаларга белем бирә торган мәктәпләрнең игътибар үзәгендә булырга тиешлегенә басым ясады. Аның әйтүенчә, БДИ буенча минималь баллның киметелүе сәбәбе дә ул укучыларның имтихан нәтиҗәләре түбән булуында.
Министр 2016 нчы елга Россиядә балалар бакчаларында урыннарга кытлыкны бетерү турында сөйләп, тиздән шушы ук аянычлы язмышка мәктәпләрнең дә дучар булачагын ассызыклады. “Бу проблема инде күп кенә төбәкләргә хас”, - диде ул. Дмитрий Ливанов өч елдан мәктәпләрдә яңа урыннарга җитди ихтыяҗ туачагын билгеләп узып, моның демографик вәзгыять яхшыруга бәйле булуын искәртте.