Беренче сентябрьдән Алабугада тагын ике балалар бакчасы эшли башлый

1 июньгә булган мәгълүматларга караганда, Алабугада 1 июньгә 590 сабый балалар бакчасына юллама алган.
Быел шәһәрдә көтеп алынган тагын ике яңа балалар бакчасы үз ишекләрен ачачак. Бу чиратны якынча 500 кешегә киметергә мөмкинлек бирәчәк. Шул рәвешле, 1 сентябрьгә Алабугада мәктәпкәчә учреждениеләрнең саны икегә артып, 42гә җитәчәк.
Алабуга муниципаль районы буенча балалар бакчалары белән тәэмин ителеш 72 процент тәшкил итә. Шәһәрдәге мәктәпкәчә белем бирү учреждениеләре тулы куәтенә эшчәнлек алып бара. Аларның яртысында балалар саны проектта каралган урыннар исәбеннән артып китә.
Быел Алабугадагы мәктәпкәчә учреждениеләр 6-7 яшьтәге 822 баланы тәрбияләп чыгарды, дип хәбәр ителә җирле үзидарә органнары сайтында. Шунысын да искәртергә кирәк, быел Татарстан Мәгариф һәм фән министрлыгы бакчада тәрбияләнеп чыгучыларның мәктәптә белем алырга әзерме-түгелме икәнлеген ачыклау максатыннан мониторинг үткәрә башлады. Әлеге мониторинг нәтиҗәләре буенча, Алабуга районында бакчада тәрбияләнеп чыккан балаларның 86,5 процентының (472 кеше) әзерлек дәрәҗәсе югары, 45 процентының (326) мәктәпкә әзерлеге уртача. Булачак мәктәп укучыларының 7,5 проценты (24) мөгаллимнәр тарафыннан зур игътибар таләп итә.