Зәй шәһәрендә ике яңа балалар бакчасы ачылачак

Зәй шәһәрендә берьюлы ике яңа балалар бакчасы кулланылышка тапшырылачак. Бу көннәрдә биредә “Зернышко” (55 урынлы) һәм “Шатлык” (120 урынлы) мәктәпкәчә белем бирү оешмалары ачылачак. 2012-2013 уку елларында җирле бюджет хисабына район авылларында мәктәп яны мәйданнары базасында 60 урынлы 3 балалар бакчасы ачылды. Соңгы өч елда мәктәпкәчә балалар өчен барлыгы 320 урын булдырылган. Быел “Зернышка” һәм Бура-Киртә авылы балалар бакчаларын төзекләндереп бетергәч, шулай ук “Шатлык” балалар бакчасын кулланылышка тапшырганнан соң республика һәм федераль бюджет хисабына тагын 160 өстәмә урын булдырылачак. 2015 елда республика бюджеты хисабына Зәй муниципаль районында 140 урынлы балалар бакчасы төзү, шулай ук “Красная шапочка” балалар бакчасының буш мәйданында 20 урынлык өстәмә төркемнәр ачу планлаштырылган. Әлеге чараларны гамәлгә ашыру районда балалар бакчасына урыннар җитмәү белән бәйле һ.б. социаль мәсьәләләрне хәл итәргә ярдәм итәчәк.