Татарстанда мәктәп укучыларын Проектлауга өйрәтү ассоциациясе булдырылган

7 июль көнне ТР Мәгариф һәм фән министрлыгы ярдәмендә Мәктәп укучыларын проектлауга өйрәтү ассоциациясе (Ассоциация проектного образования школьников) булдырылды. Килешүгә имза кую тантанасы КНИТУ-КХТИның уку-укыту бинасында булды.
Документны имзалауда Казан илкүләм тикшеренү технология университеты, “Химград” технополисы, “Идея” технопаркы, Яр Чаллыда ИТ-парк мәйданчыгы, химия укытучыларының Республика фәнни-методик берләшмәсе, Д.И.Менделеев исемендәге Россия химия җәмгыятенең республика бүлеге, КНИТУ-КХТИ Студентлар һәм мәктәп укучылары берлеге катнашты.
КНИТУ-КХТИ ректоры Герман Дьяконов сүзләренчә, әлеге ассоциация - актуаль, мөһим һәм кирәкле адым; аны булдыру турында идеяләр әле 15 ел элек барлыкка килгән.
“Бу ассоциацияне булдыру идеясе, галимнәр советында утырыштан соң, ТР Мәгариф һәм фән министрлыгының эш киңәшмәсендә сөйләшенде, ул анда хуплау тапты”, - дип сөйләде мәгариф буенча проректор Любовь Овсиенко.
Булдырылган оешманың төп максаты – укучыларның фәнни-техник иҗатын һәм проект эшен үстерү һәм аларга ярдәм итү. “Химград” технополисы белән идарә итүче, “УК “Идея Капитал” ААҖ генераль директоры Алексей Грушин билгеләп үткәнчә, бүген инновацион производство белән шөгыльләнүче Татарстанның күп кенә предприятиеләренә профессиональ кадрлар һәм фәнни эшләнмәләр кирәк. Шул ук вакытта булдырыла торган ассоциациянең бурычы – белем бирүнең проект технологиләрен кулланып, тирәлек булдыру.
Ассоциация булдыру турында килешүгә кул кую күпмедер дәрәҗәдә формаль булып тора. Эш шунда ки: бу эшчәнлек уртак проектларны тормышка ашыру ярдәмендә инде күптән гамәлдә. Алар арасында, мәсәлән, - “Инновацион полигон”, “Нобелев өметләре”, ИТ-академия һ.б.
Ассоциация юридик зат статусына ия булмый, ул инновацион бизнес һәм мәгариф учреждениеләре вәкилләренең социаль партнерлыгы формасы булачак.
Алга таба 10 көн эчендә ассоциациянең эшләү регламентын, аның эш органын билгеләү, символика һәм атрибутикасын эшләү төп бурыч булачак. Хәзер эш органы функциясен Мәгарифне үстерү институты башкарачак.