Хәзерге вакытта Н. Кайманов исемендәге кадет мәктәбендә тикшерү эшләре бара
2018 елның 23нче октябрендә «Советлар Союзы Герое Никита Кайманов исемендәге кадет мәктәбе»ндә булган факт буенча Татарстан Республикасы Мәгариф һәм фән министрлыгы түбәндәгеләрне хәбәр итә.
Министрлык балаларга карата әдәпсез мөрәҗәгать итү фактын педагогик этика нормаларына каршы һәм ярамаган эш дип саный. Хәзерге вакытта мәктәптә математика дәресендә педагог белән бала арасында туган низагның сәбәпләрен өйрәнү буенча тикшерү эше үткәрелә. Мәктәптә Яр Чаллы шәһәренең балигъ булмаганнар эшләре бүлеге хезмәткәрләре эшли.
Үткәрелгән тикшерү нәтиҗәләре буенча тиешле чаралар күрү турында карар кабул ителәчәк.
Министрлык әлеге педагогның гомуми педагогик стажы 40 елдан артык булуын, аның физика-математика фәннәре кандидаты, доцент булуын да билгеләп үтә. Бу мәктәптә ул 2018 елның 1нче сентябреннән эшли. Әлеге укытучыга бу очракка кадәр кисәтмәләр ясалганы булмаган.