Инвалидлыгы булган кешеләрнең һөнәри осталык буенча төбәк чемпионатында җиңүчеләр Мәскәүдә узачак милли ярышта катнашачаклар
Бүген Казанда инвалидлыгы булган кешеләр арасында һөнәри осталык буенча “Абилимпикс-2018 " төбәк чемпионаты ачылды. Ике көн дәвамында 180гә якын татарстанлы Мәскәүдәге IV илкүләм чемпионатта катнашу хокукы өчен көрәшәчәк.
Республикада төбәк чемпионаты дүрт мәйданчыкта – Казан сәүдә-икътисад техникумында, Казан төзелеш көллиятендә, Казанның кече бизнес һәм эшмәкәрлек көллиятендә һәм Түбән Каманың техник иҗат һәм һөнәри юнәлеш бирү үзәгендә («Кванториум»да) уза.
Быел ярышлар өч: «студентлар», «белгечләр» һәм «мәктәп укучылары» категорияләре буенча оештырылган. Катнашучылар 25 компетенция буенча ярыша, ә узган ел алар бары җидәү генә иде. Конкурста төп экспертлар булып эш бирүчеләр тора.
Казан сәүдә-икътисад техникумында чемпионатның төбәк этабын ачу тантанасында Татарстан Республикасы Премьер-министры урынбасары Ләйлә Фазлыева, Татарстан Республикасы мәгариф һәм фән министрының беренче урынбасары Андрей Поминов, «Абилимпикс» һөнәри осталык бәйгеләрен үстерү милли үзәге җитәкчесе Динә Макеева катнашты.