«Чишәргә чык!» («Выходи решать!») Бөтенроссия контроль эше Татарстанда 4 мәйданчыкта узачак
17нче ноябрьдә физика, математика һәм информатика буенча «Чишәргә чык!» («Выходи решать!») бөтенроссия контроль эше узачак. Оештыручылар сүзләренә караганда, контроль эшләр гомуми белем бирү мәктәбенең 8-9 сыйныф белеме дәрәҗәсенә исәпләнгән. Контроль эштә катнашырга мәктәп укучылары да, төгәл фәннәрдән үз белемнәрен тикшерергә теләгән өлкәннәр дә чакырыла. Һәр фән буенча гадидән катлаулыга таба төзелгән 5 бирем каралган, соңгы бирем – иң авыры, дип кисәтә төзүчеләр. Стартка кадәр контроль вариантларны чишеп карап, күнегүләр ясарга тәкъдим ителә. Алар рәсми сайтта бар: http://kontrolnaya.mipt.ru/. Шунда ук контрольдә катнашу өчен теркәлергә кирәк.
Бөтенроссия контроль эше бөтен ил буенча 90 шәһәрдә узачак, аны үткәрү өчен 160тан артык мәйданчык теркәлгән. Татарстанлылар үз көчләрен 4 мәйданчыкта сынап карый алачак.