Татарстанда инглиз телен белмәүче чиновниклар җитәкче урыннарда эшли алмаячак

Тиздән аларның чит телне ни дәрәҗәдә белү-белмәүләрен тикшереп, сайлап ала башлаячаклар.
Татарстанда халыкны инглиз теленә өйрәтү буенча актив эш алып барыла. Моннан берничә ел элек чит тел белүнең мөһимлегенә әллә ни зур игътибар бирмиләр иде. Ләкин 2013 елда узачак Универсиада әлеге вәзгыятьне тиз арада үзгәртүгә мәҗбүр итә. Шул чакта гына республикадагы инглиз телен өйрәтү системасының халыкара таләпләргә бөтенләй дә туры килмәве ачыкланды.

Бу турыда Татарстан президенты Рөстәм Миңнеханов әледән-әле искәртеп тора. Башкалабызда шушы көннәрдә генә эшли башлаган EF English First халыкара инглиз теленә өйрәтү үзәген ачу тантанасында да ул бу турыда кат-кат әйтте.

Аның фикеренчә, иң мөһиме - мәктәп һәм югары уку йортлары мөгаллимнәрен укыту. Әгәр дә алар чит телне югары дәрәҗәдә үзләштерсәләр, бу киләчәктә балаларның инглиз теле белән проблемалары булмаячак дигән сүз. Бүгенгә укытучыларның әлеге халыкара телне белү дәрәҗәсе 5,5 пунктка күтәрелгән инде. Бу да зур прогресс.

Ә менә түрәләр, дәүләт эшлеклеләрен инглиз теленә өйрәтүе авыр икән. Тик тиздән аларны Шекспир телен белүче һәм белмәүчеләргә «аралау» башланачак. «Алар арасыннан инглиз теле белән «дус булмаучы»лар Татарстан алдында торган максат һәм бурычларны тормышка ашыруда катнаша алмаячак. Бу - җитәкче урыннарда эшләүчеләрнең һәрберсе инглиз телендә аралаша алырга тиеш дигән сүз», дип белдерде Рөстәм Миңнеханов.

Хәзер инглиз теленә өйрәтү буенча республиканың өр-яңа инновацион партнеры бар. EF English First үзәгендә теләге булган һәркем укый ала. Уку бәясе - аена 5-6 мең сум. Шунысы мөһим: анда һәр укучы өчен аерым программа төзелә, ул укытучылар белән генә түгел, ә он-лайн режимда да укый ала. Ягъни, белем алучылар көненә 24 сәгать буе инглиз телен өйрәнеп утыра ала дигән сүз. «Якын киләчәктә татар телен өйрәтү буенча да шундый программа булдырылачак», дип ышандырды Рөстәм Миңнеханов.