Бала булып килә узасым

Арчаның 2нче мәктәбенең оешуына 80 ел булса, Арча станциясендәге бинасы төзелүенә — 40 ел. Коллектив (директоры Гөлнара Гарипова) ветераннарны, мәктәпне тәмамлаучыларны чакырып, бик зурлап юбилей үткәрде.
Үзең укыган мәктәптә юбилейда катнашу бөтенләй башка. Туган мәктәбең ул синең балачагың, яшьлегең, аның ишеген ачып керүгә, әлбәттә, дулкынлану кичерәсең. Әй, мәктәбем, бүген сине котлап, җыелганнар кыз һәм улларың! Арча муниципаль район башлыгы урынбасары Любовь Осина белән без бер чорда 2нче мәктәптә белем алдык. Любовь Михайловнаның чыгышы йөрәк түреннән чыкты: “Бүгенге юбилей бөтен район бәйрәме, — дип сөйләде ул. — Чөнки 2нче мәктәптә белем алган егетләр һәм кызлар кайсы гына өлкәдә эшләми. Кадерле ветеран укытучыларыбыз, без сезне һәрчак истә тотабыз, искә алабыз, сез безнең күңелләрдә һәрчак яшь, матур”. Әйе, юбилейның иң олы, хөрмәтле кунаклары — ветеран укытучылар. Алар: Роза Абдуллина, Флюзә Нураева, Татьяна Егорова, Гөлзада Әбдрәкыйпова, Венера Нуриева, Ирина Смелова, Вера Христофорова, Зоя Никитина... (рәсемдә), күрче үзләрен, зал тутырып утыралар, чәчләренә чал төшкән, мөлаем вә сөйкемле укытучылар. Юбилейны алып баручының сүзләре йөрәккә үтеп керә. Укытучы! Җанын телем-телем кисәкләргә бүлеп сала да, бүлеп бирә һәрбер балага.
Мәрхүм укытучылар бер минутлык тынлык белән искә алынды. Алар: Василий Малков, Фатыйма Нуретдинова, Зөләйха Яруллина, Факия Баһаветдинова, Каюм Нуриев, Рәисә Рәхимова, Расиха Фазылова, Җәүһәрия Рәхимова, Валерий Христофоров һ.б. Ихтирам белән баш иябез алар алдында.
Мәктәп ачылганнан бирле коллектив белән 17 директор җитәкчелек иткән. Соңгы елларда директор булып эшләгәннәр сәхнәдә чыгыш ясадылар. “1974 елда мин мәктәпкә физкультура укытучысы булып эшкә кайттым,— дип сөйләде Линар Заһидуллин. — 3 ай эчендә фатир бирделәр. Мин бу коллективта чын кеше, педагог булып өлгердем. Каядыр минем турыда яхшы сүз әйтәләр икән, бу 2нче мәктәп коллективының хезмәте, көче.” Яхшы хәтерлим, яшь белгеч Линар Усманович мәктәптә физик тәрбия эшен шундый югарылыкка куйды, барыбыз да йөгерә башладык, чаңгыга бастык. Ул елларны чаңгы (Линар Заһидуллин), волейбол (Валерий Христофоров), баскетбол (Ринат Гәрәев) ярышларында районда 2,3 нче урыннарны алу ул безнең өчен зур җиңелү иде, дип тә искә алдылар.
“Бүген безнең арабызда сугыш ветераны, Хезмәт Кызыл Байрагы ордены кавалеры, 1970нче елларда мәктәпне җитәкләгән Хак Сабирович Шәфигуллинның булуы икеләтә бәйрәм”, — дип дәвам итте юбилейны алып баручы. “1970 елда көзен укучылар белән спортзалның нигезен казып, 1971 елда мәктәпне төзеп бетерәбез дип, җәй буе 70 укучы эшләде”, — дип искә төшерде ул елларны ветеран- педагог.
Мәктәпне тәмамлаучылар сәхнә түренә чакырылды. “Бик күңелләр булып утырабыз, — дип сөйләде “Тайд-Фойл” ширкәте җитәкчесе Айдар Закиров. — Мәктәпкә нинди яхшы ремонт үткәрелгән. Рәхмәт безне укыткан укытучыларга, ныклы белем биргәнсез, турыдан-туры хәрби училищега укырга керә алдым”.
Юбилей программасы эчтәлекле төзелгән иде. Пионерлар, комсомоллар, Әфганстан сугышында катнашкан солдатлар турында да җылы итеп искә алынды.
Бүгенге коллектив уңышлары күз алдында. Нәтиҗәле эшләгән педагогларга район Советының, мәгариф идарәсенең Мактау грамоталары, муниципаль район башлыгының Рәхмәт хатлары бирелде.
...Эх, мәктәбемә илтер юллар буйлап, бала булып килә узасым. Мәктәпнең, укытучыларның көче әнә шунда!