“РФдә мәгариф турында” ФЗ кабул ителү белән, Татарстанның яңа “Мәгариф турында” закон проектын эшләү көтелә

ТР Дәүләт Советының Мәдәният, фән, мәгариф һәм милли мәсьәләләр комитеты утырышында “Татарстан Республикасында мәдәни мирас объектлары турында” ТР Закон проектына үзгәрешләр кертү хакында” закон проектын беренче укылышка әзерләделәр.
Әлеге закон проекты республика законнарын федераль законнарга туры китерү максатыннан эшләнгән. “РФ халыклары мәдәни мирас (тарих һәм мәдәният һәйкәлләре) объектлары турында” Федераль законга һәм РФ Шәһәр корылыш кодексына кертелгән үзгәрешләр нигезендә, РФ субъектлары дәүләт хакимияте органнарына өстәмә вәкаләтләр бирелә. Алар РФ субъекты тарихы һәм мәдәнияты өчен нык әһәмиятле булган тарихи җирлекләр исемлеген раслаудан, төбәк әһәмиятендәге тарихи җирлекне саклау предметын, шулай ук генераль планнар, җирдән файдалану һәм төзелеш алып бару проектларын килештерү мәсьәләләрен билгеләүдән гыйбарәт.
Комитет утырышында каралган закон проекты белән “Татарстан Республикасында мәдәни мирас объектлары турында” ТР Закон проектына үзгәрешләр кертелә.
ТР Мәдәният министры Светлана Персова сүзләренчә, әлеге үзгәрешләр күптән көтелгән булган. Аның сүзләренчә, депутатлар тарафыннан бу юнәлештә зур эш алып барылган. “Шулай итеп, федераль законга кирәкле үзгәрешләр кертелде”, - диде урынбасар. Комитет рәисе Разил Вәлиев исә “федераль закон безнең башлангычларны хуплады”, дип белдерде.
Комитет утырышында шулай ук яңа “Мәгариф турында” республика закон проектын эшләү өчен эшче төркем төзү турында карар кабул ителде. Ул узган ел ахырында кабул ителгән “РФдә мәгариф турында” федераль законга кертелгән үзгәрешләрне исәпкә алырга тиеш. Федераль закон 2013 елның 1 сентябреннән гамәлгә керергә тиеш. ТР Мәгариф һәм фән министрының беренче урынбасары Данил Мостафин сүзләренчә, “мәгариф турында яңа закон кирәклеге аңлашыла иде инде”. Ул да республика законында Федераль закондагы үзгәрешләрнең чагылыш табарга тиешлеген билгеләп үтте.
Фото http://mn.ru сайтыннан