Яшьләрне читкә этәрмәгез!

Дәүләт җитәкчеләре сәләтле яшьләргә игътибарлы булырга, алар белән актив эшләргә, аларны республиканың киләчәге итеп кабул итәргә тиеш, дип саный Татарстан президенты Рөстәм Миңнеханов.
Әлеге фикерне ул IT-лицей бинасында узган республикакүләм Яшьләр форумына йомгак ясау тантанасында җиткерде. Чарада төрле министрлык һәм дәүләт оешмалары җитәкчеләре дә катнашты.
1000 проектның 9ы гына эшкә ярый?
Республикакүләм яшьләр форумының төп максаты – республиканың сәләтле яшьләрен барлау, алар тарафыннан эшләнгән инновацион һәм иҗтимагый әһәмияткә ия булган проектларны тормышка ашыру өчен шартлар тудыру, шул рәвешле аларга үсәргә, камилләшергә ярдәм итү. Чарада 16 яшьтән алып 30 яшькә кадәр теләге булган һәркем катнаша ала. Шунысын да билгеләп үтү кирәк, республикакүләм яшьләр форумының популярлыгы елдан-ел арта. Быел бу бәйгедә катнашу өчен барлыгы меңнән артык проект тәкъдим ителгән. Шуларның 60тан артыгы бәйгенең финал өлешенә сайлап алынган. Абсолют җиңүчеләр исеменә исә бары тик 9 проект кына лаек дип табылган.
Яшьләргә тиешле игътибар бирелми
Чара барышында республика башлыгы Рөстәм Миңнеханов та җиңүчеләрнең әз булуына игътибар итеп, форумга тәкъдим ителгән бер генә проектны да игътибардан читтә калдырмаска боерды. “Татарстан үссен, камилләшсен өчен яшь, көчле, лидерлык сәләтенә ия шәхесләр кирәк. Республикабызның киләчәге нәкъ менә алар кулында бит. Тик кызганыч, безнең хөкүмәт җитәкчеләре яшьләргә ышанмый, алар тарафыннан әйтелгән тәкъдим һәм идеяләргә җиңел карый, тиешле игътибар бирми. Бу – дөрес түгел. Без республиканың сәләтле яшьләре белән таныш булырга, аларга һәрьяклап ярдәм күрсәтергә, аларны яңадан-яңа идеяләр белән баетырга тиеш. Шуңа күрә, республикакүләм яшьләр форумында тәкъдим ителгән бер генә проект та күз уңыннан читтә калырга тиеш түгел”, - дип мөрәҗәгать итте Рөстәм Миңнеханов җитәкчеләргә.
Барысы да яшьләр кулына каласы...
Президент сүзләренә караганда, начар проект эшләгән дип кенә, студентны наданнар рәтенә чыгарып калдыру дөрес түгел. Иң мөһиме, ул кул кушырып утырмый - уйлана, эшли, ясый, төзи, димәк Татарстанның киләчәгенә битараф түгел, дигән сүз. Беренчесе начар булса, икенчесе яхшы, ә өченчесе исә, гомумән дә, уникаль проект булырга мөмкин. “Беренче чиратта ,бу республика өчен дә әһәмиятле. Без хәзер мәш килеп инновацион икътисад турында сөйлибез. Ә ул икътисадны кем тулысынча тормышка ашыра алачак соң? Минме? Сезме? Юк, әлбәттә. Бу - бары тик сәләтле яшь көчләр булганда гына мөмкин. Ә безнең максат исә - аларга ярдәм итү”, - дип өстәде Президент.
Чара форум җиңүчеләрен бүләкләү тантанасы белән дәвам итте. Форум кысаларында Рөстәм Миңнеханов Татарстанның махсус дәүләт стипендияләренә лаек булган студентлар белән дә очрашты. Әлеге акчалата бүләккә 2012 ел нәтиҗәләре буенча барлыгы 90 кеше лаек, дип табылган. Аларның 62се Казанда белем ала. Стипендиянең күләме аспирантлар өчен - 33,3 мең сум, югары уку йорты студентларына исә – 16,7 мең сум тәшкил итә.